Beteja për njohjen ligjore të çifteve të së njëjtës gjini në Serbi

Në të gjithë Ballkanin, është fakt i ditur tashmë që përpos ditëve të Paradave të Krenarisë apo javëve specifike të dedikuara ndaj komunitetit LGBTI+, në jetën e përditshme pjesëtarët e komunitetit përballen me mosnjohje, diskiminim, përçmim dhe në jo pak raste edhe dhunë.

Njëjtë si në vendin tonë dhe vendet fqinje, edhe në Serbi, mentaliteti patriarkal dhe konservator do e bënte të pamundur organizimin e Paradës së Krenarisë së Beogradit, nëse nuk do të ishte për forcat policore që mbrojnë aktivistët dhe përkrahësit e kauzës gjatë paradës.

Prej disa javësh tashmë, një çift të rejash lezbike, po përpiqet të ndryshojë ligjet e vendit e të mundësojë njohjen e bashkëjetesës dhe partneritetit mes individëve të gjinisë së njëjtë, duke e dërguar nismën e tyre ligjore në instancat më të larta juridike të vendit. Në rast të një përgjigjeje pozitive dhe njohjes së partneritetit midis tyre, precedenti do të shërbente për njohjen e martesave të gjinisë së njëjtë në Serbi dhe do të inkurajonte dhe vendet fqinje për të ndjekur të njëjtin shembull.

Ne duam më shumë se të drejtën për të marshuar në një paradë një herë në vit.

“Edhe pse kjo është një betejë personale për ne, suksesi ynë do të ishte gjithashtu një fitore për mijëra çifte të të njëjtit seks në Serbi që duan të jenë në gjendje të hyjnë në një partneritet ligjor.”, deklarojnë Jelena dhe Suncica.

“Ne vetëm kërkojmë të drejtat e njëjta të garantuara nga Kushtetuta e Serbisë si për të tjerët – në pronë dhe trashëgimi, në mbulimin shëndetësor bashkëshortor – të jenë të drejta reale për ne, të shkruara në letër. Të drejtat që gjithkush i merr për të mirëqëna.”

Më datë 17 prill, ato u përpoqën të rregjistrojnë lidhjen e tyre në zyrën e gjendjes civile në Novis Sad, por kërkesa e tyre nuk u mor parasysh nga autoritetet. Një veprim i tillë është përsëritur edhe për dy raste të tjera, duke nxitur vajzat pvr të ndërmarrë një betejë ligjore kundër institucioneve, për shkak se mos-njohja e martesës bie ndesh me Kushtetutën e Serbisë, Konventën Evropiane për të Drejtat e Njeriut dhe atë Ndërkombëtare.

Tashmë vajzat dhe skuadra e tyre ligjore, po përpiqen të mbledhin fonde për vijimin e betejës ligjore institucionale dhe për të marrë një vendim të formës së prerë, i cili nëse është negativ, do të mund të ankimohet në Gjykatën Evropiane të të drejtave të njeriut.

Nëse dëshironi të kontribuoni për kauzën dhe betejën e tyre ligjore, ndiqni në vijim linkun: Ligjërimi i dashurisë – Fushatë për mbledhje fondesh