Sot ishte dita e dytë e protestës, që pa një rritje të numrit të studentëve. Studentët duken të vendosur në mospranimin e vendosjes së tarifës për provimet e mbartura.
Me thirrjet ”Ulni tarifat”, ”Jemi studentë, jo klientë” studentët u mblodhën fillimisht në Korpusin qendror për të vazhduar më tej protestën pranë Ministrisë së Arsimit.
Në një konferencë për mediat, Ministrja Nikolla deklaroi se përgjegjësia e tarifave i takon universiteteve, ndërsa gjatë protestës ishin vetë studentët që deklaruan se kushtet ishin të panegociueshme, duke mos pranuar dhe duke përzënë dhe përfaqësues së Ministrisë.
Për solidarizim, mësimi u bojkotua dhe nga studentët e Universitetit ‘Aleksandër Xhuvani’ në Elbasan dhe Universitetit të Durrësit.
Protesta pritet të vazhdojë dhe ditën e nesërme.
Përfaqësues së Lëvizjes për Universitetin iu bashkuan protestës, së bashku me disa pedagogë.
“Ministrja ka firmosur vendime që janë kundër interesave të studentëve. Ne nuk jemi sqaruar aspak, nuk iu përgjigj pyetjeve tona. Kjo VKM si është miratuar ashtu duhet shfuqizuar.” – deklaroi njëra nga protestueset.
Ndërkohë një tjetër student foli për reagimin e kryeministrit Edi Rama që i quajti kazanë protestuesit.
“Derisa VKM të shfuqizohet, studententët do rrinë në rrugë duke bojkotuar shkollën. U vendos që në çdo fakultet në Tiranë apo rrethe, orët e mëngjesit do bojkotohen dhe studentët do protestojnë deri në shfuqizim.
Rezistenca studentore do vazhdojë pasi do kuptohet që të drejtat e studentët duhet të vihen në vend. Nuk do i nënshtrohemi një arrogance që kërkon të bëjë show me fjalët,” tha ai./k.j
Trending Now
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.