Korçe, fëmijët Rom dhe Egjiptian edhe pas dy vitesh të segreguar në shkollën “Naim Frashëri”

Bëri jehonë në media dy vite më parë rasti i shkollës “Naim Frashëri” në Korçë ku 100% e nxënësve të saj ishin fëmijë nga komuniteti Rom dhe Egjiptian. Grumbullimi i fëmijëve Romë dhe Egjiptian në një shkollë të veçantë nxit edhe më shumë izolimin e tyre në shoqëri. Gazeta Standard ka rikthyer edhe njëherë në vëmendje problematikën e cila vazhdon edhe sot pas dy vitesh.

Ende sot 283 fëmijë Rom dhe Egjiptian vazhdojnë të studiojnë në shkollën 9-vjeçare që gjendet në periferi të qytetit të Korçës. Sipas aktivistes Eva Tare, segregimi i shkollës filloi në vitet e para të demokracisë ku donatorë të ndryshëm filluan të ndihmonin familjet rome dhe egjiptiane me paketa ushqimore për fëmijët për shkak të pamundësive ekonomike që ato kishin. Edhe pse me qëllimin e një arsimi gjithëpërfshirës, shkolla filloi të frekuentohej gjithmonë e më shumë nga fëmijët romë dhe egjiptianë dhe më pak nga fëmijët e tjerë. Një tjetër faktor shkruan Standard, lidhet me lëvizjet demografike të maxhorancës nga ajo lagje dhe shtimi i popullsisë rome dhe egjiptiane.

Edhe pse janë bërë përpjekje të vazhdueshme nga organizata të shoqërisë civile për të zgjidhur problemin, ende sot pas shumë vitesh, situata vazhdon të jetë e njëjtë.

“Ne kemi dërguar sugjerimet tona drejt MAS që janë: Rikonstruksion i plotë i kësaj shkolle; Hapja e një mense jo vetëm tek kjo shkollë por edhe tek shkollat e tjera ku ka fëmijë me probleme sociale në mënyrë që të mos jetë diskriminuese; Udhëzim i veçantë që fëmijët të frekuentojnë shkollën ku jetojnë,që do të thotë edhe ajo pjesë maxhorance që është të mos largohet në një shkollë tjetër por të vijojë shkollën aty”, ka thënë znj. Tare për gazetën Standard. /m.g/

Nga Brejdon Xhavara

Shkrimi i plotë:

Segregimi i shkollës “Naim Frashëri” në Korçë dhe problematika e pandalshme me fëmijët romë