Perspektiva e të rinjve për zgjedhjet e 25 Prillit

Nga Isa Myzyraj

“Prej shumë vitesh unë e kam djegur votën dhe është e vetmja herë që jam e motivuar për të shkuar në qendrën e votimit dhe për t’i ndëshkuar me votë partitë e sistemit të vjetër”

Kështu shprehet Entenela Ndrevataj, 25-vjeçare, gazetare në Shqipëri dhe aktiviste prej vitesh, ndërsa shpreson se në zgjedhjet e 25 prillit partitë e vjetra siç i quan ajo të marrin një goditje nga vota e të rinjëve kryesisht, pasi të gjitha statistikat në vend tregojnë se të rinjtë shqiptarë janë indiferent kur vjen puna tek politika, e posaçerisht tek zgjedhjet.

I të njëjtit mendim është edhe, 21-vjeçari Fatjon Biba, një aktivist i zëshëm në Shqipëri, kryesisht për çështet që lidhen me arsimin: “Dhe nëse asnjë force nuk të përfaqëson mendoj se është më mirë që të shkosh për të votuar e ta bësh votën tënde të pavlefshme në mënyrë që të tregosh se je aty, në mënyrë që të tregosh se e ushtrove detyrën tënde por askush nuk të përfaqëson.”

Studenti i Fakultetit të Drejtësisë në Tiranë, nuk ka një preferencë politike në këto zgjedhje, pasi shprehet se  idealet dhe parimet tij, nuk përputhen me ato çka ai ka parë dhe sheh tek partitë poltike shqiptare, – ku në fakt  sipas tij “e vërteta është që nuk kanë ideale aspak, por thjesht janë disa persona që i kanë kapur këto parti dhe shohin interesin e tyre personal.”

Edhe pse fushata zgjedhore zyrtarisht nuk ka nisur ende, të gjitha partitë politike tanimë janë në fushëbetejë.

Bora, është një 24-vjeçare që ditën e saj e ndan mes Fakultetit ku studion për Informatikë dhe pasionit të saj, udhëtimet me qëllim eksplorimin e fshatrave të ndryshëm të Shqipërisë.

Njëri prej prindërve të saj, punon në një nga institucionet qendrore në Tiranë, edhe shprehet se do të ushtrojë të drejtën e votës të dielën e 25 prillit, ndërsa shton se: “Jemi të zhgënjyer nga qeveria, dhe shpresoj që të bëhet më mirë, pas shtatorit kur edhe nis punën qeveria e re.”

“Kam udhëtuar në qindra fshatra, anembanë vendit, kam parë njerëz edhe aty ku nuk shkon makina, madje as rruga, për ironi edhe telefonat nuk kishin sinjal; Kam parë në këto zona ndalje të kohës, nëse mund ta them ndalje të civilizimit. Zhgënjim, urrejtje dhe mallkime ndaj qeverisë së tyre, mendoj që një model i tillë duhet të ndalet, dhe të nisë një model tjetë ndoshta është koha për pak ndryshim”- thotë Bora teksa, pyetjes se “A është opozita një model tjetër nga ky që ka parë, ajo i shmanget duke qeshur : “mjaft tani se do më heqin babin nga puna”.

23-vjeçari, Ervin Bajraktari, që jeton në qytetin bregdetar të Durrësit, është një aktivist pranë një subjekti politik. Ervini thotë se ai jo vetëm që do të votojë, por pret edhe një ndryshim pas 25 prillit. “Shoh shume gjëra që kanë nevojë për ndryshim apo përmirësim në këtë vend dhe kam dëshirën e mirë për të kontribuar, ashtu sikurse edhe Gandi thotë: “’Ji ndryshimi që kërkon të shohësh në botë.’”-shprehet studenti i Fizioterapisë, pranë Universitetit të Durrësit.

Ndryshimi i “brishtë” post-zgjedhor!

Në Shqipëri, ndërrimi i qeverive, është shoqëruar vazhdimisht me reforma të reja, që janë kundërshtuar vazhdimisht nga  partitë opozitare.

Menaxhimi i Pandemisë së Koronavirusit, që ka marrë më shumë se 1800 jetë në Shqipëri, është një ndër sfidat më të mëdha të kujtëdo që do të qeverisë vendin pas zgjedhjeve.

Entenela, shpreson se këtë vit në Shqipëri alternativat e reja do të hyjnë në parlament për të përfaqësuar qytetarët shqiptarë. Këto alternativa kryesisht janë krijuar pas ndarjeve nga partitë e vjetra, por ka dhe disa të tjera që janë krijuar si grupime të reja politike që do të garojnë për herë të parë në zgjedhje së bashku me shumë kandidatë të rinj të pavarur.

‘Pres dhe shpresoj që një nga alternativat e reja të futet në Parlament dhe të nisë shpërbërjen e këtij sistemi politik dhe partive 30-vjeçare që mbahen në këmbë përmes rotacionit, për hir vetëm të rotacioni. “-shprehet 25-vjeçarja.

Një ekonomi e cila ka marrë një goditje fatale, pas tërmetit të nëntorit të 2019, dhe mes pandemisë, kërkon një përgjigje ekselente, në muajt në vijim ku edhe papunësia po rritet dita ditës.

Një ndër pikat më të ndjeshme për Shqiptarët, Integrimi Europian, është ende ëndërr e premtuar çdo 4 vite kur ka zgjedhje, që pas rënies së sistemit komunist në 1990, dhe për këtë Partia në Pushtet prej 2013, Partia Socisliste, e drejtuar nga Edi Rama duket se “ka hequr dorë” pasi fajin ia kanë kaluar problemeve të brendshme të unionit, ndërsa pretendenti për Kryeministër, Kreu i Partisë Demokratike, Lulzim Basha ka bërë premtimin joshës; Çelje negociatash në 6 muaj.

Fatjon Biba është skeptik, ai e thotë qartë se nuk pret ndryshime të mëdha.

“Mendoj se situata politike në vend do jetë më e rënduar seç është aktualisht, dhe nuk pres të ketë stabilitetin e nevojshëm. Për pasojë nuk do të shohim ndryshime rrënjeësore.”

Ndërsa Bajraktari e sheh ndryshimin e situatës në vend të lidhur me fitoren e secilës parti.

Nëse opozita – sipas tij, – vjen në pushtet, situata do të ndyshojë për mirë në çdo fushë, – ndërsa bën parashtrimin e zymtë se nëse PS vijon qeverisjen gjërat vetëm do të përkeqësohen!

Reforma në drejtësi, është një prej reformave më të mëdha në pothuajse të gjithë tranzicionin post-kominist, ndërsa vijimi i kësaj reforme të diskutueshme në vend, por e mbështetur fort nga ndërkombëtarët shihet nga Bora, si ndarja përfundimtare e Shqipërisë “para” dhe “pas” drejtësisë së re.

Por, edhe më të rinjtë që janë aktiv në jetën publike, shprehen optimistë për zgjedhjet e prillit, që do të mbahen në mes të pandemisë së koronavirusit.

Blerti Kastrati, një 19-vjeçar që jeton në Tiranë, dhe studiun regjinë dhe teatrin, tregon se do të shkojë të votojë, pasi ai nuk mund ta shikojë vendin, teksa sipas tij- degradon dita, ditës.

Ai shpreson për një rotacion politik, dhe jep sygjerim që duhet krijuar fryma popullore për të ndertuar vendin, dhe institucione të forta, që qeveritë të funksionojnë.

Prioritetet e qeverisë së re në Shqipërinë e vjetër

Mirëqënia sociale, zhvillimi ekonomik, inovacioni, dhe menaxhimi i burimeve natyrore për Borën, janë fusha që duhet të jenë prioritet i qeverisë së re.

Gëzime Moshallari, 20-vjeç nga qyteti u Durrësit, shprehet se kohët e fundit në sajë të angazhimeve të saj, ka takuar dhjetëra qytetarë, ndërsa thotë se pioritet i padiskutueshëm i qeverisë së re duhet të jetë hapja e vendeve të reja të punës, në mënyrë që të rritet ekonomia dhe të reduktohet largimi masiv i të rinjve nga vendi.

“Duhet thënë qe ky largim masiv i të rinjve nga vendi shkakton probleme të mëdha demografike, rënie të fuqisë punëtore, e si pasojë rënie të ekonomisë e të buxhetit të shtetit.”-shprehet ajo.

“Çlirimi i shtetit nga kapja!”-një koncept sa i vjetër për vendet e zhvilluara, aq edhe aktual në Shqipëri, duhet të jetë prioritet i prioriteteve i udhëhëheqjes së ardhshme sipas studentit të fizioterapisë, Ervinit, që edhe pse dega e tij është një fushë e mjekësisë, sërish arrin të shpjegojë qartë atë që ai e quan “kapja e shtetit”, ku krimi i organizuar dhe shkelja e kushtetutës së vendit, sipas tij janë bërë sistemi që duhet shembur një herë e mirë.

Shqipëria, laget nga dy dete, Joni, dhe Adriatiku dhe është e pasur me vijë të gjatë bregdetare, Gjire, kepe dhe Ishuj, male, liqene e lumej, dhe pikërisht se ekonomia shqiptare varet nga Turizmi në mënyrë direkte për aktivistin Fatjon Bina, kjo gjë duhet të jetë një prioritet, së bashku me fushën e arsimit ku ai prej vitesh është i angazhuar për përmirësimin e saj, së fundmi edhe me nismën e suksesshme “Qëndresa Qytetare”!

“Padyshim për mua prioriteti më i rëndësishem mbetet Arsimi. Është invesimi që çdo qeveri duhet të bëj nëse duam që të shohim progres. “-thotë ai.

Të etur për ndryshim

Sipas Entenelës, qeveritë kanë dështuar që të luftojnë korrupsionin në Shqipëri, dhe pabarazinë ekonomike, por edhe pse ajo nuk ka besim tek qeveria që do të vijë, ajo përsëri këmbëngulë që në këto dy fusha duhet ndërhyrë.

Ndërsa, studentja e Marrëdhënieve me Publikun, Gëzime Moshallari shpreson që pas zgjedhjeve : “Vendi im duhet të zhvillohet e duhet të evolojë, që të kemi nje sistem të mirefilltë demokratik, që të funksionojë shteti i së drejtës, që të zbatohet meritokracia, që të hapen vende pune dhe që të ketë progres ekonomik. Vendi ynë duhet ende të punojë shumë për të plotësuar kriteret e anëtarësimit në Bashkimin Europian. Dua vërtetë shumë që ky ndryshim të ndodh pas zgjedhjeve. Dhe si unë besoj se do çdo i ri dhe e re e këtij vendi.”/ HistoriaIme