Shqipëria zhvillon paradën e parë në botë online: S’ka drejtësi për LGBTI nëse nuk ka demokraci për gjithë të tjerët

Mbi 100 aktivistë shqiptarë dhe mbështetës të tyre organizuan sot të parin event në botë të krenarisë që u zhvillua duke përdorur teknologjinë online, në kushtet e distancimit social.

Ata u shprehën se “parada nuk është një event, por një pikëtakim me të kaluarën dhe me të ardhmen tonë të përbashkët. Ajo nuk është një ngjarje, por një proçes që fillon fillimisht nën dhunën e izolimit personal, dhunë që na mban për vite të frikësuar dhe të izoluar brenda vetes, për të shpërthyer pastaj, më në fund, në formën e një proteste shoqërore dhe si i tillë, ky proçes nuk matet dot me orë, as me ditë, e as me javë”.

Për rreth 2 orë, aktivistë, përfaqësues të ambasadave të huaja në Tiranë, pjesëtarë te komuniteti LGBTI dhe mbështetës së kauzës, u bënë bashkë për të përqëndruar dhe një herë vëmendjen te dashuria, e cila mundi çdo barrierë teknike dhe fizike në këtë edicion të 9 të Paradës.

Me moton se parada nuk është një moment në kalendar, por zemreku i një solidariteti shoqëror që nuk ka mekanizëm izolimi që ta ndalojë së ecuri përpara, aktivistët theksuan gjithashtu se “parada për pasojë, nuk është vetëm një marshim, por frymë, të cilën nuk e mban gjallë numri i njerëzve që parakalojnë, por mendjet tona që kanë mundësinë ta rikrijojnë”.

Përshëndetën në këtë aktivitet unik, organizimi i të cilit është ndjekur me vëmendje nga shumë aktivistë të Europës për shkak të unikalitetit të tij, edhe ambasadorët e vendeve si Suedia, Mbretëria e Vendeve të Ulta, ambasadori i Bashkimit Evropian, kryesuesja e Këshillit të Europës, etj, ndërsa këngëtari Boiken Lako, një mbështetës i përhershëm i të drejtave të njeriut performoi disa këngë gjatë eventit online.

Më tej, fotografi Jetmir Idrizi prezantoi “Queerantine”, ekspozitën unike me portrete të komunitetit LGBT që nga sot është online në instragram (queerantine.al). Avokatja e Popullit, znj. Erinda Ballanca, gjithashtu e pranishme në event ishte e të njëjtit mendim me aktivistët se nuk mund të ketë drejtësi për komunitetit LGBT, pa patur drejtësi për gjithë Shqipërinë.

Shumë prej aktivistëve mbajtën si sfond të imazhit të tyre mesazhin “Mbro Teatrin”. Duke mbajtur një qëndrim publik ndaj çështjes së Teatrit Kombëtar. Aktivistët Xheni Karaj dhe Kristi Pinderi thanë gjithashtu se besonin që nuk mund të fitojnë barazi nëse Shqipëria nuk ofron mundësi të barabarta edhe për gjithë të tjerët.

Eventi i rregjistruar ditën e sotme, do të transmetohet në vijim në rrjetet sociale të Aleanca LGBT dhe Historia Ime.

Pride vazhdon… #PrideON