Ditën e dielë, mijëra vetë janë dyndur në rrugët e Kievit në paradën më të madhe dhe më paqësore LGBTI+ që është mbajtur ndonjëherë në Ukrainë. Ndonëse marshuesit ishin gjatë githë kohës të rrethuar nga një kordon i trashë i helmetave policore, megjithatë nuk pati ndonjë shenjë dhune pavarësisht pranisë së disa qindra protestuesve të ekstremit të djathtë dhe atyre fetarë.
Disa nga pankartat përfaqësuese ishin “Diversiteti është i bukur”, “Të drejtat e njeriut = vend i lumtur”, “Nuk ka dhunë – po të drejta!”.
Presidenti ukrainas Volodimir Zelenskiy, një ish-komedian i cili mori postin muajin e kaluar, ka promovuar një kulturë tolerante, duke thënë se ai mbështet barazinë dhe lirinë e të gjithë njerëzve. Zyra e Zelenskit i kërkoi policisë të parandalojë dhunën dhe të garantojë sigurinë e pjesëmarrësve në marsin e barazisë.
Gjithashtu, Oslo një kryeqytet europian dhe me traditë të gjatë në kultivimin e kulturës në mbrojtjen e të drejtave të njeriut, në kuadër të “Gay Pride 2019” ka organizuar një sërë aktivitetesh të cilat kanë përfshirë pjesën më të madhe të popullsisë norvegjeze. Oslo Pride është një festival vjetor që bashkon komunitetin lokal LGBT, mbështetësit dhe aleatët për ngjarjen më të madhe të komunitetit LGBTI+ në Norvegji.
Mijëra njerëz u mblodhën në Oslo këtë fundjavë për të përmbyllur festimet 10-ditore të “Oslo Pride”, gjithashtu, mijëra të tjerë kanë manifestuar në qytete dhe fshatra më të vegjël nëpër të gjithë vendin. Mesazhi kryesor i këtyre aktiviteteve ishte se duhet që njerëzit e të gjitha orientimeve seksuale të jenë krenarë e të tregojnë se kush janë në të vërtetë. /l.k/
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.