Konferenca vjetore e aktivistëve të rinj për çështjet LGBTI

IGLYO, organizata ndërkombëtare e aktivistëve të rinj për çështjet LGBTI, organizoi konferencën vjetore të radhës, në Helsinki, ku gjithashtu organizata Pro-LGBT pati përfaqësinë e saj, për të marrë pjesë në votimin e bordit të ri të organizatës, statutit dhe planit të aktiviteteve për vitin e ardhshëm.

Në këtë aktivitet u diskutua gjerësisht situata aktuale në kontinentin evropian, mungesa e përfaqësimit dhe ligjeve mbështetëse për të drejtat LGBTI, diskriminimi shoqëror dhe ai brenda vetë komunitetit, si dhe sfidat me të cilat aktivistët e rinj përballen në punën e tyre të përditshme.

Konferenca u mirëprit dhe nga Ministra e Edukimit e Finlandës Li Andersson, e cila gjatë fjalës së saj përmendi arritjet e vendit të saj, por njëkohësisht dhe punën e madhe që duhet bërë për krijimin e realiteteve të ngjashme kudo në Evropë.

Gjatë konferencës u diskutua më tej dhe për vazhdimësinë e projektit “Le të flasim për shkollat tona”, një bashkëpunim mes IGLYO dhe Pro-LGBT.

Në fazën e parë përgatitëm dhe përkthyem në shqip anketën mbi përfshirjen e të rinjve LGBTI në edukim dhe eksperiencat e tyre gjatë periudhës së arsimit të detyruar dhe në vazhdimësi pritet të publikohen gjetjet e kësaj ankete, ku do të kemi dhe një pamje më të qartë të situatës së ngacmimeve dhe bulizmit në shkolla.

Gjatë ditës së tretë, u votua dhe bordi i ri i organizatës dhe fokusi i saj në mandatin e ardhshëm.

Konferenca mblodhi mbi 100 aktivistë, ku dhe Pro-LGBT pati mundësinë për të prezantuar situatën e komunitetit në Shqipëri, rezultatet e punës sonë dhe organizatave partnere, si dhe u shkëmbyen eksperiencat dhe praktikat e mira në përmirësimin e situatës për komunitetin LGBTI+ në vendet tona.

IGLYO financohet nga programi REC – Rights Equality and Citizenship (REC) 2014-2020 i Bashkimi Evropian.

Partnerë dhe donatorë të tjerë kryesor të IGLYO janë Fondacioni i Rinisë Evropiane i Këshillit të Evropës dhe Ministria e Edukimit dhe Kulturës e Mbretërisë së Vendeve të Ulta.