Gjykata e Durrësit ka vendosur të lërë në burg shtatë adoleshentët që akuzohen se abuzuan seksualisht me 13-vjeçaren nga Kavaja. Shtatë djemtë, nxënës të shkollës 9-vjeçare në Kavajë kanë dalë sot para gjykatës për rivlerësimin e masës së sigurisë, pasi akuzohen për “marrëdhënie seksuale me të mitur”, ndërkohë që një tjetër djalë mbetet në kërkim nga autoritetet.
Të miturit janë marrë në pyetje në prani të psikologes në polici dhe në gjykatë. Vajza e mitur ka pranuar abuzimin nga djemtë dhe ka rrëfyer për kërcënimet ndaj saj, gjithashtu në prani të psikologes dhe punonjëses sociale.
Rasti në fjalë shokoi opinionin publik gjatë ditës së djeshme për shkak të mosfunksionimit të një sërë instancash dhe mekanizmash të shoqërisë, që nga shkolla e punonjësit socialë, deri te bashkëmoshatarët e vajzës dhe familjarët e tyre.
Banorë të Kavajës që dërgojnë fëmijët e tyre në të njëjtën shkollë ku ndodhi ngjarja, deklaruan për mediat se kanë mësuar mbi rastin vetëm kur u bë publik në media, ndërsa flasin fjalët më të mira për familjen e vajzës minorene.
Mësohet se policia dhe prokuroria kanë marrë në pyetje dhe mësuesen kujdestare dhe drejtoreshën e shkollës, të cilat kanë deklaruar se nuk dinin gjë mbi rastin në fjalë.
Përmes një njoftimi, Prokuroria deklaron se rasti po trajtohet me impenjimin e duhur dhe maksimal në zbatim të detyrës dhe në përputhje me normat dhe detyrimet që parashikon Kodi i Drejtësisë Penale për të Mitur. Prokuroria thotë se duke marrë shkas nga rasti ku të gjithë personat janë të mitur është vendosur që mos publikohen të dhënat e të akuzuarve për këtë rast.
You may also like
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.