Komisioni i ri Evropian, në pritje të Komisionerit për Zgjerim, perspektiva për zgjerim nuk ndryshon

Pas zgjedhjes së Ursula von der Leyen si Presidente e Komisionit Evropian, deri në muajin tetor, shtetet anëtare të BE pritet të plotësojnë vakancat për komisionerë. Secili shtet anëtar ka të drejtën e nominimit të një komisioneri, i cili mbulon një fushë specifike strategjike të BE-së.

Një nga postet më të rëndësishme përsa i përket të ardhmes së Shqipërisë dhe rajonit si pjesë e Bashkimit Evropian, është ai i Komisionerit për fqinjësi dhe zgjerim, një pozicion i cili në mandatin e kaluar u mbajt nga Johannes Hahn.

Komisioneri Hahn u rizgjodh nga kancelarja e Austrisë për të mbajtur një pozicion në Komision, por ende nuk dihet nëse do të qëndrojë në të njëtën detyrë apo nëse do të ndërrojë portofol.

Gjatë një vizite në Beograd, ai deklaroi se me siguri do të heqë dorë nga portofoli i tij aktual gjatë mandatit të tij të tretë në Komisionin Evropian, por gjithashtu theksoi se ai do të mbetet i përkushtuar në rajonin e Ballkanit Perëndimor.

Ndërkohë ky post duket se po synohet edhe nga Sllovenia, një vend fqinj i rajonit, që ka qenë përkrahës për zgjerim gjatë mandateve të shkuara qeverisëse të BE-së.

Kryeministri i Sllovenisë Marjan Šarec ka emëruar Janez Lenarčič, kreun e misionit të Sllovenisë në Bashkimin Evropian, si Komisionerin e ri për Zgjerimin.

Në një intervistë për EWB, eurodeputetja Tanja Fajon beson se ai do të mbajë mbështetje të fortë për integrimin e Ballkanit Perëndimor në BE.
“Sllovenia ka përvojë, është afër rajonit dhe do të jetë padyshim një gjë pozitive për rajonin, pasi vendi ynë do të kryesojë Bashkimin Evropian në vitin 2021 dhe do t’i kushtojë një rëndësi të madhe agjendës zgjeruese “, deklaroi ajo.

Vetë Fajon u konsiderua një kandidate e mundshme për pozicionin, por është e drejta e Kryeministrit të emërojë këdo që dëshiron, deklaron ajo.

“Uroj që Janez Lenarčič, të cilin e njoh shumë mirë, të punojë mirë në interes të të gjithëve në BE”, thekson ajo. Fajon u zgjodh në Parlamentin Evropian për një mandat të tretë këtë maj si anëtare e Grupit të Socialistëve dhe Demokratëve. Ajo votoi kundër zgjedhjes së Ursula von der Leyen për President të Komisionit Evropian më 16 korrik për shkak të braktisjes së procedurës Spitzenkanidat, të cilën ajo e konsideroi si një masë anti-demokratike brenda BE-së.

Interes për pozicionin e Komisionerit për Zgjerim ka shprehur dhe Hungaria, por ende nuk ka një kandidat zyrtar. Priten ende zhvillimet e shtatorit, për të patur një panoramë më të qartë të përbërjes së Komisionit të ri Evropian./kj