Javën e kaluar, më shumë se 100 partnerë publik dhe privat nënshkruan deklaratën e Aleancës Qarkore të Plastikës, e cila promovon veprime vullnetare për një treg funksional të BE-së në industrinë e plastikës së ricikluar.
Deklarata parashikon se si aleanca do të arrijë objektivin e 10 milion ton plastikë të ricikluar të përdorur për të prodhuar produkte të reja çdo vit në Evropë, deri në vitin 2025.
Ky objektiv u vendos nga Komisioni Evropian në Strategjinë e tij për përdorimin e plastikës, si pjesë e përpjekjeve të tij për të rritur riciklimin e saj në Evropë.
Zëvëndës Presidenti i Komisionit Evropian Frans Timmermans, përgjegjës për zhvillimin e qëndrueshëm, deklaroi se: “Unë mirëpres angazhimet e industrisë për të rimenduar mënyrën se si ne prodhojmë dhe përdorim plastikën. Duke ricikluar në mënyrë efikase plastikën, ne do të pastrojmë planetin dhe do të luftojmë ndryshimin e klimës, duke zëvendësuar karburantet fosile me mbeturina plastike në ciklin e prodhimit. “
Deklarata, e nënshkruar nga bizneset e vogla dhe të mesme, korporatat e mëdha, shoqatat e biznesit, standardizuesit, organizatat kërkimore dhe autoritetet lokale dhe kombëtare miratojnë objektivin prej 10 milion tonësh dhe bën thirrje për një ulje të mbetjeve plastike në natyrë deri në zero.
Deklarata e Aleancës do të mbetet e hapur për nënshkrim në faqen e internetit të Komisionit për t’i dhënë mundësi më shumë nënshkruesve të bashkohen, në veçanti autoriteteve publike nga e gjithë Evropa.
Në BE, mundësia për riciklimin e mbeturinave plastike është akoma e pashfrytëzuar, veçanërisht në krahasim me materiale të tjera si letra, qelqi ose metalet.
Nga mbi 27 milion ton mbeturina plastike të mbledhura në Evropë çdo vit, më pak se një e treta shkon në impiante riciklimi. Si rezultat, në vitin 2016, më pak se 4 milion ton plastikë të riciklueshme u shitën në Evropë, duke zënë mezi 8% të tregut të BE për plastikë.
Duke miratuar objektivin prej 10 milion tonë deri në vitin 2025, Aleanca angazhohet të ndihmojë në rritjen e tregut të BE për plastikën e ricikluar dhe njëkohësisht të ngadalësojë efekte3t dëmtuese të ndotjes prej plastikës dhe ngrohjes globale.
Burimi: Komisioni Evropian
Burimi i fotos: Pixabay
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.