• Copyright

    <span>Copyright</span>

    © 2019 Historia Ime

April 16, 2025
Author

Kristi Pinderi

Mbrojtës i palodhur për të drejtat e LGBT+ është bashkëthemelues i ProLGBT dhe I Aleancës Kundër Diskriminimit, të dyja organizatat kryesore për mbrojtjen e personave LGBT+ në Shqipëri. Në dhjetor të 2014 ai ishte ndër themeluesit e STREHA, shelterit të parë për personat LGBT+ në të gjithë Europën Juglindore. Kristi ka kryer studimetbachelor për Histori dhe Arkeologji në Universitetin e Tiranës dhe ka kryer edhe një sezon kërkimor në fushën e komunikimit të trashëgimisë kulturore në Universitetin e Bolonjës.


LGBTI+  / Ndodhi sot  / SLIDER BALLINA  / Te Drejtat e Njeriut
Brunei kriminalizon marrëdhëniet brenda të njëjtit seks
Kristi Pinderi Posted On 28/03/2019


Një ligj i ri që hyn në fuqi nga java e ardhshme do të ndëshkojë marrëdhëniet brenda të njëjtës gjini dhe tradhtinë bashkëshortore me vdekje në mbretërinë e vogël të Bruneit në Azinë Juglindore.

Duke filluar nga data 3 prill, çdo individ i shpallur fajtor për veprat penale të mësipërme do të vritet me gurë, sipas një kodi të ri penal. Dënimi do të “dëshmohet nga një grup muslimanësh”.

Ligjet e reja rigoroze të vendit u shpallën në vitin 2014 dhe janë implementuar gradualisht në mbretërinë që udhëhiqet me ligje islamike.
Faza e fundit e zbatimit, duke përfshirë dispozitat e reja, u shpall në faqen e internetit të Prokurorit të Përgjithshëm të Bruneit më 29 dhjetor 2018.

Grupet e të drejtave të njeriut ishin të shpejtë për të shprehur kundërshtimin dhe indinjatën me dispozitat e reja në kodin penal, i cili gjithashtu do të urdhërojë amputimin e gjymtyrëve si një dënim për vjedhje.

Brunei u bë vendi i parë në rajon që miratoi ligjin e sheriatit në vitin 2014, një sistem ligjor islamik i cili përshkruan dënime të rrepta trupore.
Mbretëria e vogël e pasur me naftë me pak më shumë se 450,000 njerëz ndodhet në ishullin e Borneos, pranë vendeve të moderuara islamike të Indonezisë dhe Malajzisë.
Në krahasim me fqinjët e saj, Brunei është rritur konservativ në vitet e fundit, duke përfshirë ndalimin e shitjes së alkoolit për popullsinë. /k.j


Continue Reading
0


Feminizmi  / Punesimi  / SLIDER BALLINA  / Te Drejtat e Njeriut
Puna e seksit në Rusi – kriminalizimi nuk ndihmon, por çfarë bën?
Kristi Pinderi Posted On 28/03/2019


Kriminalizimi i punës seksuale (ose prostitucionit- varësisht prej argumentimit të qëndrimit) është një nga ato probleme që ekzistojnë gjithkund, por askush nuk e di cila është zgjidhja.

Në Rusi, prostitucioni penalizohet nga një gjobë e vogël, e paguar nga vetë punonjësi/ja e seksit, ndërsa klienti është i përjashtuar nga çdo përgjegjësi. Tutorët mund të dënohen me një gjobë të rëndë, ose dënim me burg (ndonëse është zbatuar rrallë).

Si më poshtë do të shpjegohet pse kjo qasje është problematike, duke krahasuar kriminalizimin me legalizimin e plotë në Gjermani.

Edhe pse situata në Gjermani është shumë e ndryshme nga ajo e Rusisë, ka një tipar të përbashkët – shumica absolute e punëtorëve të seksit fillojnë të punojnë në këtë industri, sepse kanë nevojë për para.

Me interes të veçantë, është shtjellimi i një qasjeje tjetër – njohur edhe si modeli nordik dhe i cili tashmë është përdorur në Suedi dhe në disa vende të tjera,- që ka të bëjë me ndalimin e ndëshkimit të punonjësve të seksit dhe gjobitjen e klientëve të tyre, ndërkohe dhe investohet fort në mbështetjen sociale dhe edukimin për gratë që duan të largohen nga sfera e seksit të komercializuar.

Megjithatë, ka mjaft informacione të rëndësishme në lidhje me llojin e korrupsionit dhe abuzimit të pushtetit që buron rreth kriminalizmit të punës së seksit. Vëmendje të posaçme meriton fakti që pabarazia, dhe varfëria janë arsyet kryesore të përhapjes së punës së seksit – në Rusi, numri i punonjësve të seksit gjatë viteve të fundit, po rritet për shkak të krizës ekonomike. Kjo është arsyeja pse në Gjermani shumica e punonjësve të seksit janë emigrantë nga vendet më të varfëra të Europës Lindore.

Fakte:

Në Rusi, ka rreth 1 milion punonjës/e seksi të deklaruar (në një popullsi prej 140 milionë banorësh), por përtej deklarimeve, shifrat mund të shkojnë deri në 3 milionë.

Shumica e tyre vijnë nga një sfond vulnerabël, pa mbështetje sociale  apo mundësi  të tjera për të fituar para.

Më të prekurat janë gratë e reja, kryesisht të rritura në jetimore. Një e treta e tyre përfundojnë tregun e punës së seksit. Arsyeja është mungesa e lidhjeve të forta shoqërore dhe aftësive të rëndësishme jetësore.

/l.k/

Burimi: News Mavens


Continue Reading
0


Ndodhi sot  / SLIDER BALLINA
Brexit nuk kalon në Parlament
Kristi Pinderi Posted On 28/03/2019


Asnjë nga opsionet e propozuara për Brexit nuk kanë siguruar mbështetje të qartë pas një votimi të përbashkët mbrëmjen e së mërkurës.

Sipas mediave britanike, thirrjet për një doganë të përbashkët me BE-në u refuzuan nga 272 me 264 vota ndërsa një thirrje për një referendum për të miratuar ndonjë marrëveshje u hodh poshtë me 295 në 268 vota.

Rezultatet përfunduan një ditë të vëdhtirë për Britaninë e Madhe, kur kryeministrja britanike premtoi të dorëhiqet nga posti nëse ndonjë prej marrëveshjeve të saj do të miratohej.

Marrëveshjet përfshinin daljen nga BE pa një marrëveshje, qëndrimin në tregun e përbashkët apo dhe mundësinë e thirrjes së një referendumi mbi marrëveshjet.

Tani Britania e madhe ndodhet në një udhëkryq politik dhe nuk dihet se cila do të jetë e ardhmja e vendit, ndërkohë që afati përfundimtar për daljen nga BE është shtyrë sërish me disa javë. /k.j


Continue Reading
0


Edukimi  / Per Studente  / Punesimi  / SLIDER BALLINA  / Te Drejtat e Njeriut
Shkencat Sociale nuk sjellin benefite për tregun e punës
Kristi Pinderi Posted On 27/03/2019


Në një fjali kaq të thjeshtë, thënë sikur të ishte përnjëmend e vërtetë, ndoshta edhe e pakundërshtueshme, përcillet mjaft qartë sesa dhe sesi vlerësohen individët në shoqërinë tonë.

Keni të drejtë! Shkencat sociale nuk sjellin benefite. Fundja, sot pak rëndësi kanë humaniteti apo vlerat! Kujt i duhet sot mendimi kritik, teksa mësojmë si të mendojmë njësoj, ose më saktë, mësojmë si të mos mendojmë fare!

Vërtet, kujt i duhen shkencat sociale?! A keni pasur ndonjë mundësi të kaloni së paku pranë godinës së këtij  fakulteti? Do të takoheni me studente/ë dhe pedagoge/ë të përkushtuar, antikonformistë dhe të aftë për të ngritur zërin! Por kujt i duhen sot njerëzit që kanë guximin të artikulojnë haptazi padrejtësitë, aq më pak të ndërmarrin veprime kundrejt tyre! E pra, pyetja na u dashka bërë “Kujt nuk i duhen shkencat sociale”?

Shkencat sociale nuk i duhen kujt! E përse na u dashkan kauzat për barazi gjinore, kur ne legjitimojmë fort patriarkalizmin e ulur këmbëkryq ndër ne! Përse na duhen ne shkencat që adresojnë problemet sociale pa anë e fund të shoqërisë aktuale? Të na tregojnë për shqiptarët që duan të migrojnë, të ikin sa më larg sepse nuk e imagjinojnë dot të ardhmen, ndërkohë që u supozuaka të qenkëshim vendi ideal për të jetuar? Pse na duhen shkencat sociale? Të na flasin për depresionin kolektiv, për humbjen e përgjithshme të shpresës, për mosekzistencën e së tashmes, apo për kotësinë e jetës?

E pra, përse na u dashkan shkencat sociale, kur ato nuk sjellin benefite në tregun e punës? Tregu i punës në rastin më të mirë, të vlerëson vetëm si shumatore notash, të atyre notave skandaloze të përfituara kush e di sesi, notave te ekselentëve dhe ngelësave!

Ndërkohë, ne refuzojmë të jemi pjesë e një tregu që jep një copë punë për ta nxjerrë si arritje në një video, shoqëruar me nje buzëqeshje. Shkencat sociale zhvlerësojnë notën, vlerësojnë dijen. Ne duam të ndajmë perspektiva, dritare horizonti për tematika të shumta, që të mos kënaqemi me pak, që të mos bëhemi papagaj shumëngjyrësh të fjalëve të bukura dhe boshe, që s’i kuptojmë as vetë! Shkencat sociale nuk formësojnë ushtarë të bindur, ne refuzojmë të jemi të tillë. Shkencat sociale mund t’ju flasin papushim për realitetin paralel që është krijuar. Ne mund t’ju flasim për iluzionin e meritokraciosë apo për haluçinacionet se të gjithë kemi mundësi të barabarta, pavarësisht se kush jemi. Në këtë kontekst, dozat e medikamenteve janë shumë të larta!

Shkencat sociale nuk hyjnë në punë! E përse duhet të hyjnë në punë institucionet që duan të fuqizojnë individin, që duan të frymëzojnë bashkimet, ndërkohë që misioni kryesor sot është ta tjetërsosh njeriun në një hiç, ta ulësh, ta përulësh, ta kthesh në një qenie pa shtyllë kurrizore, që ta kesh të thjeshtë ta shfrytëzosh, komandosh! Kur ne na duhen individë robotikë, pse te vlerësojme njerëzit me mendje të gjallë dhe kreative! Shkencat sociale nxisin zbulimin e vetes, rritjen e potencialit personal, ndërkohë që kërkohet nxitja e analfabetizmit që autoriteti të të duket gjeni.

Kujt i duhen shkencat sociale? Në një shoqëri ku vazhdimisht duam të përfitojmë, kujt i duhen njerëzit që luftojnë paragjykimin, diskriminimin, që shqetësohen për gjendjen aktuale dhe vështirësive të përditshme të ditë-natës me të cilat perballemi shumica prej nesh!

Kujt i duhen shkencat sociale! Fakulteti i vlerave, argumenteve, lirisë dhe mendimit kritik. Kujt i duhet Fakulteti i Shkencave Sociale; shpirti i protestave, rebelimit, pranimit, historia brenda historisë!

Shkrim i përgatitur nga Tana Aliaj.


Continue Reading
0


BASHKIMI EVROPIAN  / Per Studente  / Punesimi  / SLIDER BALLINA  / Te Drejtat e Njeriut
Parlamenti Europian miraton pagesën e praktikave të punës
Kristi Pinderi Posted On 27/03/2019


Ditën e djeshme, zyra e Parlamentit Europian miratoi rregulla të reja mbi praktikat e punës, duke ndaluar prej korrikut praktikat e papaguara në zyrat e deputetëve europianë. Ky vendim është një fitore për aktivistët për të drejtat e praktikantëve. Grupi i të Rinjve në Parlamentin Evropian ka kohë që po bën thirrje për praktika të ndershme. Sipas një sondazhi, 1/4 praktikantë në zyrat e MEP në Parlamentin Evropian paguhen më pak se 600€ dhe 8% e tyre janë të papaguar.

Zyra e Parlamentit Europian ka miratuar rregulla të reja në lidhje me të trajnuarit në zyrat e deputetëve europianë, duke ndjekur parimet kyçe të miratuara korrikun e kaluar. Në të ardhmen, të trajnuarit do të punësohen drejtpërdrejt nga Parlamenti Europian, do të mbulohen sigurimet shëndetësore dhe do të paguhen diku mes 800€  dhe 1313€ në muaj, duke përmirësuar në mënyrë drastike kushtet aktuale të praktikantëve në Parlamentin Europian. Si të diplomuarit, ashtu dhe studentët do të kenë mundësinë të ndërmarrin praktika në Parlamentin Europian për një periudhë nga 6 javë deri në 5 muaj, me afat maksimal deri në 9 muaj. Përveç kësaj, deputetët e parlamentit mund të ofrojnë vizita studimore për një kohëzgjatje maksimale prej 6 javësh dhe të ofrojnë praktika në vendin e tyre sipas legjislacionit kombëtar. Këto rregulla të reja do të hyjnë në fuqi me fillimin e mandatit të ri në korrik të këtij viti.

Dy vite më parë, Intergrupi i të Rinjve publikoi rezultatet e një studimi me fokus praktikantët në zyrat e Parlamentit Europian dhe grupet politike. Ky studim, nxorri në sipërfaqe një problem të rëndësishëm me cilësinë e ulët të praktikave të ofruara në Parlamentin Europian. Ata nisën një fushatë për të ndryshuar rregullat e brendshme të parlamentit. Deputeti Tomas Zdechovsky, bashkëkryesues i Intergrupit të të Rinjve: “Ne kemi punuar shumë për ta marrë çështjen në agjendën e Byrosë dhe jemi të lumtur të shohim se është marrë një vendim para përfundimit të mandatit. Ne shpresojmë që institucionet e tjera evropiane ta ndjekin me shpejtësi kët nismë.

Deputeti Brando Benifei, bashkëkryesues i Intergrupit të të Rinjve tha: ‘’Ky vendim është në përputhje me kërkesat tona, të cilat janë mbështetur nga mbi 140 deputetë. Parlamenti Europian më në fund do të japë shembullin e tij. Ne do të vazhdojmë të punojmë për të përmirësuar situatën për të gjithë të rinjtë. Shumë syresh, janë të ngecur në spiralen e stazhit dhe formave të tjera jo-standarde të punës. Duhet bërë më shumë punë. Kompanitë dhe qeveritë kombëtare duhet të rrisin stekën e tyre për të siguruar praktika cilësore. Në nivel europian, Komisioni Europian duhet të vlerësojë ndikimin e ‘Kornizës së Cilësisë për Trajnimet’ dhe të ndërmarrë hapa të mëtejshëm për ta zbatuar atë. ”/l.k/


Continue Reading
0


BASHKIMI EVROPIAN  / Ndodhi sot  / SLIDER BALLINA
70 vjetori i Këshillit të Evropës, organizata e parë me fokus mbrojtjen e të drejtave të njeriut
Kristi Pinderi Posted On 27/03/2019


Pavarësisht dilemave të mëdha me të cilat po përballet kontinenti ynë, muaji mars shënon 70 vjetorin e themelimit të Këshillit të Evropës, organizata e parë me fokus mbrojtjen e të drejtave të njeriut.

Organizata rinore pranë KiE festoi javën e shkuar arritjet e Këshillit të Evropës, të cilat që nga viti 1949, kanë formuar Kontinentin tonë.

Nga krijimi i një zone të përbashkët të shteteve evropiane ku dënimi me vdekje është zhdukur pothuajse ne të gjithë shtetet, te heqja nga përdorimi i “shtretërve neto” të cilët mbanin të lidhur pacientët në psikiatri, njohja e gjuhës së urrejtjes si çështje e të drejtave të njeriut, thyerja e heshtjes mbi abuzimin seksual të të miturve dhe deri te formimi i gjeneratave të reja që besojnë dhe luftojnë për të drejtat e njeriut dhe demokracinë, lista e arritjeve të Këshillit të Evropës në vite është e gjatë.

Falë Këshillit të Evropës, të rinjtë sot kanë qasje më të mirë ndaj të drejtave të njeriut, mundësitë për pjesëmarrjen e të rinjve në vendimmarrje janë rritur, përmirësimi i kushteve të punës së të rinjve është një synim kryesor dhe janë mundësuar zgjidhje për politika për të rinjtë në situata të përjashtimit, diskriminimit dhe dhunës.

Përfaqësuesit e rinj të Këshillit dhe përfaqësuesit qeveritarë përgjegjës për çështjet e të rinjve në 50 Shtetet Palë të Konventës Kulturore Evropiane kremtuan me krenari arritjet e Këshillit të Evropës këto 70 vite nën motton “Të Drejtat tona. Liritë tona. Evropa jonë.”. /k.j

 

 


Continue Reading
0


SLIDER BALLINA  / Te Drejtat e Njeriut
Abuzimet seksuale me emigrantët, situata shqetësuese pavarësisht gjinisë së tyre
Kristi Pinderi Posted On 27/03/2019


Evropa vazhdon të presë valë të shumta emigrantësh nga përtej Mesdheut. Me stabilizimin e gjendjes politike në Siri dhe pjesërisht në shtetet e tjera të Lindjes së Mesme duket se valët migratore nga lindja po shuhen, por janë ende të shumtë emigrantët që nga vende të ndryshme të Afrikës synojnë Evropën si të vetmen alternativë shpëtimi.

Në udhëtimin e tyre të gjatë për në Evropë, emigrantët bien pre e aktiviteteve të paligjshme dhe një nga problematikat më shqetësuese është ajo e abuzimeve seksuale. Sipas një studimi të Komisionit të Grave Refugjate (WRC) , meshkujt abuzohen pothuajse po aq sa gratë.

Emigrantët në mënyrë të përsëritur përballen me përdhunimin dhe torturën seksuale. Të dhënat e siguruara nga studimi në fjalë janë bazuar në dhjetra intervista me emigrantë dhe punonjës në qendrat e pritjes së tyre.

Në Libi situata paraqitet më shqetësuese se në vendet e tjera, pasi portet e Libisë janë kthyer në porte emigrantësh të paligjshëm, ku njerëz nga shtete të ndryshme afrikane mblidhen dhe në kushte të vështira presin të kalojnë Mesdheun për në brigjet italiane. Ato të cilët nuk arrijnë të kalojnë detin, vendosen në qendra paraburgimi nga roja bregdetare libiane, ku përballen me shumë abuzime dhe dhjetëra shkelje të të drejtave të njeriut.

Ka shumë raste ku emigrantët janë filmuar ndërsa torturohen dhe pamjet janë përdorur për të kërkuar pagesa për familjet e tyre, thotë studimi, duke shtuar se rreziku i abuzimit seksual është pothuajse aq i lartë për meshkujt sesa për emigrantët femra.

Emigrantët gjithashtu po shfrytëzohen seksualisht dhe në Itali. Studimi thotë se “dhuna seksuale e ushtruar kundër migrantëve në udhëtimin e tyre përfshin torturën seksuale, dhunën gjenitale dhe kastrimim, dhunën seksuale vdekjeprurëse dhe raste ku burrat dhe djemtë detyrohen të përdhunojnë njëri-tjetrin, duke përfshirë anëtarët e familjes dhe kufomat.”.

“Dhuna seksuale ndaj refugjatëve dhe emigrantëve femra dhe meshkuj duket të jetë e përhapur përgjatë rrugës së migrimit, veçanërisht në Libi, ku dhunimi seksual dhe tortura kryhen në qendrat e ndalimit dhe në burgjet klandestine gjatë ndalimeve të rastësishme dhe pikave të kontrollit, përfshirë dhe në formën e punës së detyruar dhe skllavërimit. Fakti që refugjatët dhe emigrantët që përpiqen të kalojnë Mesdheun janë kapur dhe dhunuar në forma të tilla është e papranueshme”./k.j


Continue Reading
0


LGBTI+  / Seksizmi  / SLIDER BALLINA  / Te Drejtat e Njeriut
Fushata e Ilhan Omar, mbështet ligjin që ndalon terapinë e konvertimit të homoseksualëve
Kristi Pinderi Posted On 26/03/2019


Demokratët e Minesotës, e quajtën ‘’torturë’’ terapinë e konvertimit të homoseksualëve, duke u shprehur, se kjo nuk duhet të jetë më një praktikë ligjore as në Minesota, apo në ndonjë shtet tjetër.

Demokratja Ilhan Omar, gjithashtu ka tubuar me të rinjtë LGBTIQ në mbështetje të bërjes së një projektligji të ri në Minesota, kundër terapisë së konvertimit homoseksual për të miturit ose të rriturit në nevojë. Ajo, foli të enjten në emër të shtetit të saj, për një turmë që marshoi për shtatë vjetorin e Samitit të të Rinjve të Minesotës në Kolegjin ‘’Shën Pali’’.

Omar ishte bashkë-ideuese e një projektligji të ngjashëm kur ajo ishte në Kongresin e Minesotës. Ajo u zgjodh në Kongres në nëntor – si një nga dy gratë e para muslimane që kanë shërbyer ndonjëherë në Kongresin e SHBA-së. Zgjedhja e saj u prit dhe u komentua nga një shumësi njerëzish, si një shenjë që tregon për larmishmërinë e një të ri polikanësh, që vijnë në pushtet në Kapitol Hill.

Jeanine Pirro nga Fox News, kohët e fundit e sulmoi Omarin publikisht për mbajtjen e hixhabit ndërsa shërbente në Kongres, duke vënë në dyshim ose duke vënë në dukje se Omar kështu, ka mbështetur Ligjin e Sheriatit dhe jo  kushtetutën e SHBA. Fox News dënoi hapur Pirro-n,  për vërejtjet.

Demokratët e Minesotës, e cilësuan terapinë e konvertimit homoseksual si “torturuese”, çka nuk duhet lejuar që të bëhet praktikë ligjore askund, jo vetëm në Minesota.

Demokrati i Mineapolisit, Scott Dibble, i vetmi senator homoseksual në Minesota, i kërkoi turmës të takoheshin me ligjvënësit e tyre, të luftonin për ndryshim dhe të kandidonin për poste dhe pushtet. /l.k/

 


Continue Reading
0


Ndodhi sot  / PA KATEGORI  / SLIDER BALLINA
Shkatërrimi i pyjeve dhe norma shqetësuese e shpyllëzimit në Shqipëri
Kristi Pinderi Posted On 26/03/2019


Një ndër sfidat mjedisore me të cilat po përballen të gjithë shtetet e botës dekadat e fundit është nirma e lartë e shpyllëzimit dhe shkatërrimit të pyjeve, e cila kontribuon drejtpërdrejtë në përkeqësimin e fenomenit të ngrohjes globale.

Sipas “Global Forest Watch” nga viti 2001 deri në vitin 2017, rreth 337 milionë hektarë pemë u zhdukën në të gjithë botën – një sipërfaqe thuajse e barabartë me atë të shtetit të Indisë.

Në bazë të këtij raporti ka reaguar dhe Banka Botërore përmes një artikulli, ku deklaron se ‘duket se ne po e humbim betejën, nëse jo luftën, kundër shpyllëzimit dhe mungojnë disa mundësi kyçe për të trajtuar ndryshimet klimatike’.

Sipas raportit, shpyllëzimi dhe në vendin tonë ka avancuar me norma të larta ku që nga viti 2000 e deri në vitin 2017, Shqipëria ka humbur 5.5 % të totalit të pyjeve të saj, të cilët përbënin 17% të sipërfaqes totale të tokës.

Katër rajone kryesore rezultojnë përgjegjëse për 63% të të gjitha humbjeve të pemëve midis 2001 dhe 2017. Vlora kishte humbjen më të madhe të mbulimit me pemë me 8.7%. Më pas, Dibra, Korça dhe Shkodra.

Shpyllëzimi ka dhe pasoja ekonomike për vendin tonë ku sipas Organizatës për Ushqimin dhe Agrikulturën FAO, sektori pyjor ka kontribuar në ekonominë në nivel neto me humbje 5.2 milionë dollarë, që është afërsisht 0.1% e PBB-së së Shqipërisë. Njëkohësisht shpyllëzimi konsiderohet si një burim i shtimit të gazrave karbonikë CO2 në atmosferë ku sipas të dhënave përbën rreth 1.9% të emetimeve totale të gazit serë në Shqipëri gjatë të njëjtës periudhë. /k.j

Burimi: Panorama


Continue Reading
0


Feminizmi  / Punesimi  / Seksizmi  / SLIDER BALLINA  / Te Drejtat e Njeriut
Spanja shqyrton pretendimet për diskriminim gjinor në Kongresin Botëror të Celularëve
Kristi Pinderi Posted On 26/03/2019


Pas raportit të një prej sindikatave të punës, autoritetet katalane kanë hapur një hetim në lidhje me pretendimet për diskriminim seksist në përzgjedhjen e mikpritëses (hostess), për të punuar në Kongresin Botëror të Celularëve (MWC) në Barcelonë.

“Kush thotë se madhësia nuk ka rëndësi? E pra, në këtë rast, sigurisht që mikpritëset më të gjata se 1.75 metra, fitojnë më shumë se koleget e tyre nën këtë gjatësi,” deklarohet në raportin e  Bashkimit të Përgjithshëm të Punëtorëve të Katalonjës (UGT).

“Kemi gjetur një reklamë pune specifike që thotë se duhet të vishni një fund të shkurtër, pantallona të holla, taka të larta të paktën 5 centimetra, grim… Në një ofertë të posaçme, bëhet një dallim pagash duke u nisur nga gjatësia e punonjësit,” tha Nuria Gigaldo, Sekretare e Politikave të Sindikatave të UGT.

Oferta në fjalë, e postuar në faqen spanjolle të internetit për punësimin, që më pas u fshi, përcaktonte se paga për mikpritëset nën 1.75 metra, ishte 6.20 euro në orë, krahasuar me 7.20 euro për koleget e tyre më të gjata.

Kërkesa të tjera në reklama pune, të postuara në mediat sociale, përfshinin dhe masa të caktuara në bel si, 36 ose 38.

Organizatorët mohojnë akuzat për diskriminim

Claire Cranton, drejtoreshë e PR në GSMA, mohoi fuqishëm akuzat. Kompania e saj u kontraktua nga Kongresi Botëror i Celularëve për të siguruar logjistikën në lidhje me organizimin.

“Ne jemi të bindur se stafit të punësuar (…) nuk i kërkohet të përmbushë një grup të papranueshëm standardesh për punësim në MWC Barcelona,” tha Cranton. “Ne presim që të gjithë të pranishmit, duke përfshirë dhe stafin e përkohshëm që ne të punësojmë, të vishen në mënyrë të përshtatshme sa i përket fushës së biznesit. Ekipi mikpritës është i pajisur me një uniformë, pantallona të zeza ose fund (deri te gjunjtë) dhe bluzë të bardhë me xhaketë të zezë dhe një shall të kuq. Ne nuk specifikojmë gjatësinë, peshën, masën e veshjeve etj. Pretendimet e tjera janë plotësisht të rreme,” vazhdoi ajo.

Pau Mascort, kreu i menaxhimit të projektit të agjencisë së stërvitjes Tais, e cili ishte ndër ata që ishin përgjegjës për rekrutimin, tha se ata nuk po përqendroheshin në ndonjë veçori të veçantë fizike, ndonëse pati prezantime të shkëlqyeshme sa i përket pozicionit. “Ka një tendencë të re për klientët që të kërkojnë profile të veçanta,” tha ai. “Nuk është diskriminim, ne jemi në dispozicion për kërkesat e konsumatorëve”.

Gazetarja e Euronews, Emma Beswick, e cila mbulonte Kongresin Botëror të Rrjetit Celular, tha se nuk vuri re se një lloj “tipologjie” personash të punësuar për të qenë në tribunë. “Shumica duket se janë studentë apo përfaqësues të komunikimit direkt nga kompanitë ekspozuese,” tha ajo, duke vënë në dukje se kishte më shumë gra, sesa burra të punësuar në atë event.

Kongresi mbahet çdo vit në Barcelonë dhe njihet si ngjarja më e madhe e teknologjisë së lëvizshme në botë./l.k/

Burimi: EuroNews


Continue Reading
0


Blog  / Edukimi  / Per Studente  / SLIDER BALLINA
Pakti për Universitetin, shumë premtime mbeten ende në letër
Kristi Pinderi Posted On 26/03/2019


Sipas një monitorimi nga Qëndresa Qytetare, nga 22 pikat që rrjedhin prej Paktit për Universitetin, vetëm 4 janë realizuar në kohë.

“Reduktimi i tarifave të studentëve, investimi në konvikte, shkarkimi i anëtarëve të bordit dhe punësimi i ekselentëve” janë premtimet e mbajtura brenda afatit të deklaruar në Paktin e ofruar si zgjidhje nga ana e qeverisë për problematikën e krijuar në universitetet publike.

Përsa i përket pikave të tjera, 10 premtime janë ende të parealizuara si dhe dy të tjera janë mbajtur jashtë afatit të caktuar: “Nga Pakti për Universitetin kishim muajin shkurt si afat për të realizuar VKM-të që do jetësonin Kartën e Studentit, e cila nuk funksionon. Për bibliotekat online ashtu si edhe për portalin e u-transparencës, kryeministri e premtoi në janar dhe afati u shty për në mars”.

Ndërkohë që 6 pika të tjera kanë hapësirë realizimi deri më muajin qershor: “Për sa i përket Kontrollit anti-plagjiaturë, krijimit të arkivit digjital, ligjit të ri të kodit të sjelljes për integritetin e kërkimit shkencor, janë pika që janë premtuar të realizohen deri në muajin qershor dhe ne po monitorojmë situatën”.

Problematike mbetet sërish transparenca, edhe pse këtë të hënë u lançua portali për shqetësimin e studentëve ku universitetet do të tregojnë financat, një urdhër i mëparshëm i Ministrisë së Arsimit i dalë në janar që detyronte të gjitha universitetet që të publikonin brenda datës 15 të çdo muaji në faqen zyrtare të tyre të dhënat financiare sipas formatit të caktuar, nuk është zbatuar./k.j

http://facebook.com/story.php?story_fbid=2786278521598027&id=1687918801434010

 


Continue Reading
0


Ndodhi sot  / SLIDER BALLINA
Avokatët në grevë pas vrasjes së kolegut të tyre në Elbasan
Kristi Pinderi Posted On 26/03/2019


Dhoma Kombëtare e Avokatisë njoftoi ditën e djeshme mbajtjen e një greve tri ditore në formë proteste kundër vrasjes mafioze të kolegut të tyre Ravik Gurra në qytetin e Elbasanit gjatë ditës së premte. Autorët janë filmuar nga kamera të sigurisë në zonën e ngjarjes por ende nuk janë identifikuar nga autoritetet policore. Avokati Gurra ishte mbrojtës i rastit Shullazi dhe i një sërë rastesh të tjera të bujshme.

Greva pritet të nis ditën e mërkurë dhe pritet të vazhdojë deri të premten.

“Dhoma Kombëtare e Avokatisë ka marë vendim për të mos marë pjesë në procese gjyqësore për tre ditë të mërkurë, të enjte, të premte dhe çdo avokat që thyen këtë rregull do të ndëshkohet me masë disiplinore”, thuhet në njoftim.

Në njoftim bëhet e ditur se 50-vjeçari Ravik Gurra ishte anëtar i Dhomës së Avokatisë në Tiranë dhe theksohet se kërcënimet ndaj avokatëve po përshkallëzohen dita-ditës.

Njëkohësisht ditën e djeshme është mbledhur dhe Dhoma e Avokatisë në Elbasan e cila ka vendosur për të bojkotuar punën për një javë./kj


Continue Reading
0


BASHKIMI EVROPIAN  / SLIDER BALLINA  / Te Drejtat e Njeriut
Peticioni për anulimin e Brexit arrin rekordin e 5 milion nënshkrimeve
Kristi Pinderi Posted On 25/03/2019


Peticioni kërkon hedhjen poshtë të Artikullit 50 dhe qëndrimin në BE të Britanisë së Madhe.

Qeveria në mënyrë përsëritëse pretendon se dalja nga EU është “vullneti i popullit”. “Ne kemi nevojë t’i vendosim fre këtij pretendimi, duke siguruar forcën e mbështetjes publike për qëndrimin në EU. Një votim nga populli mund të mos ndodhë – prandaj voto tani”.

Peticioni i cili bën thirrje që UK te revokojë/ anulojë Artikullin 50 dhe të qëndrojë në EU ka mbledhur më shumë se 5 milion nënshkrime në më pak se 4 ditë.

Peticioni është më popullori që ka ndodhur ndonjëherë në faqen e internetit të Mbretërisë së Bashkuar. Në mëngjesin e ditës së hënë, numri i nënshkrimeve u rrit më shumë se 5.3 milion.

Peticionet me më shumë se 100.000 nënshkrime janë automatikikisht të konsideruara për nisjen e një debati në parlament. Ky peticion u shoqërua nga më shumë se 1 milion protestues të cilët marshuan nëpër rrugët e Londrës dje për të kërkuar një referendum të dytë për Brexit.

Ky peticion u postua ditën e merkurë në mbrëmje nga Margaret Anne Georgiadou. Mblodhi më shumë se 100.000 nënshkrime që në dy orët e para. Peticioni pati një sukses të atillë sa faqja zyrtare e parlamentit Britanik u bllokua për orë të shumta të enjten në mëngjes.

“Rreth 2.000 nënshkrime janë duke u plotësuar ҫdo minutë”, deklaroi Komiteti i Peticionit i Parlamentit Britanik në Twitter. “Shkalla e nënshkrimit është më e larta që vendi ka pasur ndonjëherë dhe na është dashur të bëjmë disa ndryshime për të siguruar qëndrueshmërinë e vendit dhe të qenit të hapur për nënshkrime dhe peticione të reja”.

Një hartë e pjesëmarrësve të peticionit tregoi një numër të madh të tepricave në Edinburg, Londër, Bristol, Kembrixh dhe Brighton./h.k/

 


Continue Reading
0


LGBTI+  / Seksizmi  / SLIDER BALLINA  / Te Drejtat e Njeriut
Gjykata e Lartë e Japonisë, shpjegon vendimin për sterilizmin e transgjinorëve
Kristi Pinderi Posted On 25/03/2019


Gjykata e Lartë e Japonisë ka miratuar një ligj që i detyron njerëzit transgjinorë të sterilizohen përpara se të ndryshojnë ligjërisht gjininë e tyre.

Trupi gjykues i përbërë prej katër gjyqtarëve, vendosi në 24 janar unanimisht, të refuzojë një ankesë të paraqitur nga Takakito Usui, një person trans që dëshiron të ndryshojë gjininë në dokumentet e tij zyrtare, njoftoi burimi Australian SBS News.

Usui po përpiqej të përmbyste Ligjin 111, i cili parashikon që çdo person që kërkon të ndryshojë ligjërisht gjininë e tij që të mos ketë fare “gjendra riprodhuese, apo gjendra riprodhuese që e kanë humbur funksionin”.

Njerëzit trans, gjithashtu duhet të kenë “një trup i cili duhet të duket se ka pjesë që i ngjajnë organeve gjenitale të atyre të gjinisë së kundërt”, sipas ligjit të vitit 2003, i cili u kushtetua nga gjyqtarët e Gjykatës Supreme.

Usui, fushata ligjore e të cilit tani është e gjatë, iu përgjigj vendimit duke thënë: “Gjëja thelbësore nuk duhet të jetë nëse je bërë operacion apo jo, por sesi dëshiron të jetosh si individ”.

Në vendimin e tyre, gjyqtarët thanë se Ligji 111 parandalonte “probleme” në marrëdhëniet midis prindërve dhe fëmijëve, të cilat mund të çonin në “konfuzion” dhe “ndryshime të menjëhershme” në të gjithë shoqërinë japoneze. Ata, inkurajuan shumë thatë aktivistët trans, duke thënë se legjislacioni ishte invaziv dhe duhet të rishikohet rregullisht së bashku me ndryshimet kulturore gjatë kohës.

Avokati i Usuit, tha se pasazhet e vendimeve të gjyqtarëve mund të ndihmonin në zgjerimin e fushatës, për t’i bërë politikanët të ndryshonin ligjin.

Japonia është ende në proces në lidhje me trajtimin e të drejtave për transgjinorët

Vitin e kaluar, qeveria japoneze njoftoi se do të subvenciononte operacionin  e afirmimit të gjinisë për njerëz trans,- për aq kohë sa ata nuk marrin trajtim hormonal dhe nuk kanë kushte të tjera ekzistuese.

Sapo operacioni të mbulohet nga sigurimet publike në Japoni, një pacient do të duhet vetëm të paguajë deri në 30% të shpenzimeve të përgjithshme të kirurgjisë, raportoi Japan Times.

Megjithatë, njerëzit trans që kërkojnë operacione për konfirmimin e gjinisë ende përballen me pengesa të shumta. Aplikantët duhet të jenë steril, të vetëm, pa fëmijë nën moshën 20 vjeç dhe t’i nënshtrohen një vlerësimi psikiatrik për të marrë një diagnozë të “Çrregullimit të Identitetit Gjinor” – e njohur zakonisht si disfori gjinore në SHBA dhe Britaninë e Madhe./l.k/

 


Continue Reading
0


Art & Kulturë  / Ndodhi sot  / PA KATEGORI  / SLIDER BALLINA
Deklaratat e Kryeministrit për prishjen e godinave historike në Tiranë, reagon Skena e Pavarur Kulturore
Kristi Pinderi Posted On 25/03/2019


Gjatë takimit elektoral të ditës së shtunë, rikonfirmimi i Erion Veliajt si kandidat për Tiranën në zgjedhjet e ardhshme lokale u shoqërua me deklarata shqetësuese nga ana e Kryeministrit Rama mbi shembjen e godinave përreth Sheshit Skëndërbej dhe u rikonfirmua sërish qëndrimi i autoriteteve për vazhdimin e projektit për shembjen e godinës së Teatrit Kombëtar.

Skena e Pavarur Kulturore dënon deklaratat antiligjore të kryeministrit kundër trashëgimisë kulturore dhe historike të Tiranës.

“Sheshi Skënderbej sot është një kryevepër urbanistike, e konfirmuar ndërkombëtarisht, e cila i bën Shqipërisë shërbime të mira duke i dhënë Shqipërisë çmime, komplimenta dhe foto të pafundme nga vizitorët. Por Muzeu Historik është ende një fantazmë e të shkuarës mu në mes të sheshit. Opera është në kantier dhe fatmirësisht këtë vit do të rihapë dyert dhe do të tërheqë shumë më tepër vizitorë në qënien e saj tërësisht të rilindur. Por në krah të saj Biblioteka Kombëtare është i madhi i munguar në transformimin tonë të derikëtushëm.
Teatri i kukullave është një karakatinë që na turpëron përpara fëmijëve tanë. Uroj dhe besoj që deri në fund të këtij mandati qeverisës ne do t’i hapim themelet e Blibliotekës së Re Kombëtare dhe të Teatrit të ri të fëmijëve, këtu pranë te garda, ndërsa në mandatin e ri të erionit do t’i hapim edhe dyert e këtyre dy institucioneve. Nuk harroj Teatrin e ri Kombëtar të cilin do ta ndërtojmë se sbën dhe për turpin e të gjithë atyre që e kanë baltosur pa lindur projektin tonë, le ta bëjmë teatrin e ri kombëtar një kryevepërtë të konfirmuar ndërkombëtarisht ashtu si Qemal Stafën e vjetër, Arenën e Re Kombëtare.”, deklaroi Rama gjatë fjalimit të tij.

Në përgjigje të deklaratës së Kryeministrit ka reaguar ditën e djeshme Skena e Pavarur Kulturore (SPK), e cila dënon retorikën negative, anakronike, anti-ligjore dhe anti-kulturore të kryeministrit në aktivitetin elektoral të zhvilluar të shtunën më 23 Mars në Tiranë.

“Skena e Pavarur Kulturore gjykon se kërcënimet e kryeministrit për shkatërrimin e një pjese thelbësore të trashëgimisë kulturore dhe historike të Tiranës nuk janë gjë tjetër veçse fjalë boshe. Ai nuk e ka shembur deri tani Teatrin Kombëtar jo se nuk ka dëshiruar ta shembë, por sepse deri tani nuk ka guxuar të vë në zbatim paligjshmërinë dhe anti-kushtetutshmërinë e planit të tij fillestar të Koncesionit Fusha.
Siç mund ta ketë kuptuar vetë kryeministri, projektligji i tij personal “Fusha” ka skaduar tashmë prej muajsh pa rezultat. Afati i vënë në ligj për “mbylljen e negociatave me kompaninë Fusha” brenda një muaji nga hyrja në fuqi e ligjit, ka skaduar shumë muaj më parë. Ashtu si me koncesionet e tjera personale të kryeministrit, edhe ky nuk ka ecur përpara jo për mungesë dëshire, por për shkak të frikës se kjo shkelje ligji, mund të bëhet nga rastet e para në historinë e re të Shqipërisë që përfundon me dënim të shkelësve.”

Skena e Pavarur Kulturore gjykon se protesta e vazhdueshme e Aleancës për Mbrojtjen e Teatrit dhe sakrificat e aktivistëve në mbrojtje të teatrit dhe, rrjedhimisht, të shtetit ligjor, ka dhënë frytet e veta duke ndalur një shkelje flagrante të ligjeve dhe të kushtetutës.

Duke u solidarizuar sërish me kauzen e mbrojtjes së Teatrit Kombëtar për të mos lejuar shkatërrimin e tij dhe shkeljen e Kushtetutës së vendit, SPK dënon retorikën dhe politikën e ndjekur prej Kryeministrit “në vazhdën e degradimit të trashëgimisë dhe mungesës së vullnetit të institucioneve përgjegjëse që nuk ndërmarin asnjë veprim për ta mënjanuar këtë rrezik.”

Në vijim deklarata e plotë:

https://www.facebook.com/skenapavarurkulturore/posts/2098816246895328?__xts__%5B0%5D=68.ARBacYQMXP8BAZVswcW7gPvuAA0MOYWLhSOcnsSTafjbd1c-6fqaJp6CnG5_3iMyiffwmVfZxC5p9vj_WxSsc0AzkAqMXYpi6dzUnFJVpZjIxmENCVIjD0KWKVpvAD0AVgtNbDfH9-Whbw_DQPO33for_jggyGN08xAJAuIcJs21SHmmRbHxuX525aIcoyn3YPorqu4KDc1iYO1SsLHnYComKw6GAXnsMIyhvPRPLstvD1DCq0N-nryJ7C2sZwZiLyGxpr5Mpt_7-devQHM7TvByepk-hFKwGwm7j3F6LmbuLmVbgrwl7GIdC4KgIVjBigJOdkb3YRrrMwg318XbPg&__tn__=-R


Continue Reading
0