“Vetëvendosje” Mbahet në Mal të Zi Parada e Krenarisë

Nën slloganin “Vetëvendosje” është mbajtur të shtunën, 21 tetor, parada e Krenarisë në Podgoricë.

Organizatorët thanë se komuniteti LGBT+ ende përballet me probleme të shumta dhe kërkuan miratimin i ligjeve që do të përmirësojnë pozitën e tij.

Organizatorët e Paradës së 11-të kërkuan miratimin e Ligjit për Njohjen Ligjore të Gjinisë bazuar në vetëvendosje.

Ky ligj ende nuk është futur në rend dite në Kuvend.

Anëtari i Komitetit Organizativ të Montenegro Pride, Aleksa Radonjiq, tha se secili ka të drejtë të identifikojë veten ashtu siç ndihet..

“U bëj thirrje të gjithëve që ta kuptojnë fuqinë e fjalës “Unë jam”, dhe të mos ia heqim askujt të drejtën e asaj ndjenje, sepse kështu ia heqim vetes”, tha Radonjiq.

“Ne qëndrojmë me vendosmëri për vetëvendosjen, që do të thotë fundi i frikës, shtypjes, sakrificës, kolonializmit, spastrimit etnik, fundi i heshtjes, harresës, gjenocidit, femicidit, depërtimit në autonominë trupore, sterilizimit dhe fundi i fashizmit.”

Ministri për të drejtat e njeriut dhe të pakicave Fatmir Đeka dhe ministrja e ekologjisë Ana Novaković Đurović ishin në Pride të shtunën.

Ministri për të drejtat e njeriut dhe të pakicave, Fatmir Đeka, theksoi se duhet punuar në vazhdimësi për respektimin e të drejtave të njeriut, por se ka zhvillime të mëdha.

“Ne si ministri dhe qeveri po punojmë për të përmirësuar sa më shumë pozitën e komunitetit LGBTIQ. Së bashku me Shoqatën Spektra dhe Këshillin e Evropës po punojmë për një ligj të ri për njohjen ligjore të gjinisë bazuar në vetë- vendosmëri”, tha Đeka.

Në paradë ishte edhe ish-kryetari i Podgoricës, Ivan Vukoviq.

Parada e parë e krenarisë në Mal të Zi, me trazira të ashpra dhe dhunë ku pati edhe të lënduar, u mbajt më 24 korrik 2013 në Budva.

Parlamenti i Malit të Zi miratoi Ligjin për Partneritetin në korrik të vitit 2020 dhe ai ka hyrë në fuqi më 15 korrik 2021.

Sa i përket avancimit të të drejtave të komuniteti LGBTQ+ Mali i Zi mbetet në epërsi ndaj fqinjëve në Ballkanin Perëndimor.

Historia Ime e ka ndjekur nga afër këtë paradë dhe sjell fotot e mëposhtme./ HistoriaIme