Shqipëria vendi me pagën minimale më të ulët në Europë, vetëm 160 euro në muaj

Historia Ime Posted On 06/01/2016

Shqipëria ka pagën minimale më të ulët në Europë, sipas një publikimi nga Eurostat, “Minimum wage statistics”. Paga minimale zyrtare e vendit tonë, e cila nuk ka ndryshuar që nga qershori 2015, është afërsisht 160 euro në muaj.

Jo vetëm në vlerë absolute, por edhe e matur nga standardet e fuqisë blerëse, Shqipëria ka pagën minimale më të ulët mes vendeve të Bashkimit Europian dhe atyre kandidate, sipas grafikëve që janë publikuar nga Eurostat.

Ndërkaq, Eurostat mat edhe pagën minimale në bazë të standardit të fuqisë blerëse në çdo vend, e cila për Shqipërinë është më pak se 300 euro në muaj.

Në këtë llogaritje merret parasysh paga bruto minimale, diferencat në nivelin e çmimeve, si dhe shpenzimet finale të konsumatorëve. Kjo do të thotë se qytetarët shqiptarë që paguhen me pagë minimale, kanë më pak mundësi për të blerë ushqime e mallra, në krahasim me vendet e BE-së dhe kandidatët për anëtarë të unionit.

Pas Shqipërisë, pagën më të ulët minimale sipas fuqisë blerëse, e kanë përkatësisht Bullgaria, Rumania, Maqedonia, Serbia që renditen me pagë minimale nën 200 euro.

Në vendet e Bashkimit Europian, paga minimale varion dukshëm, nga 194 euro në Bullgari në 1 923 euro në Luksemburg.

/l.k./