Punonjësit e Google marshojnë kundër sjelljeve të pahijshme dhe ngacmimeve seksuale nga eprorët

Punonjësit e Google në zyrat e kompanisë në të gjithë botën organizuan një marshim ditën e sotme, duke braktisur vendin e punës, për të protestuar kundër sjelljes së drejtuesve të lartë të kompanisë, të akuzuar për ngacmime seksuale. Protestat u caktuan nga organizatorët që të fillojnë njëkohësisht në orën 11:10 të mëngjesit për secilën zyrë. Organizatorët gjithashtu kanë hapur një llogari në Twitter, ku shfaqin fotografi nga vende të ndryshme ku po protestohet, përfshirë Singaporin, Tokion, Londrën, Dublinin dhe qytete të tjera ku kompania Google është e vendosur.

Marshimi u organizua në përgjigje të një raporti të The New York Times të botuar javën e kaluar, i cili zbuloi se dy drejtues të lartë të Google kishin paguar dhjetëra miliona dollarë në pako e shpërblime, pasi ata u larguan nga kompania pas akuzave për sjellje të keqe seksuale. Një ekzekutiv i tretë i lartë i emëruar në artikullin e Times-it u lejua fillimisht të qëndronte në kompani, por dha më pas dorëheqjen pas publikimit të raportit.

Raporti solli një reagim shumë të shpejtë nga Sundar Pichai, shefi ekzekutiv i Google. Po atë ditë, Pichai dhe Eileen Naughton, nënkryetari i kompanisë për operacionet, dërguan një email tek punonjësit duke thënë se kompania ishte seriozisht e angazhuar për të siguruar “një vend pune të qetë dhe gjithëpërfshirës.” Pichai dhe Naughton thanë se kompania kishte shkarkuar 48 njerëz për sjellje të pahijshme seksuale gjatë dy viteve të fundit.

The Times raportoi të mërkurën se organizatorët e protestës presin që më shumë se 1.500 punonjës të marrin pjesë në marshim.

Llogaria në Twitter, @GoogleWalkout, tha se punonjësit parashtruan disa kërkesa për të përmirësuar gjendjen: largim të detyruar në rastet e ngacmimit dhe diskriminimit, një angazhim për t’i dhënë fund pabarazisë së pagës midis punonjësve, hartimin e një raporti në mënyrë të vazhdueshme për raportimin e ngacmimeve seksuale; një proces të ri për raportimin e sjelljeve seksuale dhe caktimin e  një zyrtari për mbrojtjen e diversitetit të kompanisë, i cili do të ketë përgjegjësi për të raportuar tek CEO i kompanisë dhe të rekomandojë ndryshime për bordin e drejtorëve të kompanisë.

Grupi gjithashtu kërkoi që punonjësit të kenë një përfaqësues në bordin e kompanisë./k.j

Burimi: NBC News