Pacientja fiton betejën ligjore me “QSUT”/ Gjykata: “mungoi trajtimi mjekësor”
Alba Ahmetaj
Posted On 04/04/2018
Foto: Together for Life
Pacientja me iniciale E.R. ka ngritur padinë ndaj Qendrës Spitalore Universitare “Nënë Tereza” me pretendimin se ka munguar shërbimi i duhur në trajtimin e sëmundjes së saj. Me vendim të gjykatës pacientja duhet të dëmshpërblehet me dëm pasuror dhe jopasuror.
Ajo ka ngritur këtë padi, e ndihmuar prej shoqatës “Together for Life”, një organizatë jo-fitimprurëse që mbron prej vitesh të drejtat e pacientëve përmes advokimit, investigimeve, trajnimeve dhe ndjekjes ligjore për rastet konkrete të pacientëve.
Shoqata ka vënë në dispozicion ekspertë ligjorë që kanë realizuar një vlerësim të situatës si dhe ia ka komunikuar institucionit të Avokatit të Popullit, ku më pas është depozituar dhe kërkesa-padi pranë Gjykatës Administrative të Shkallës së Parë. Pas shqyrtimit të rastit, ka rezultuar se pala e paditur nuk ka shkelur protokollin duke mos i ofruar trajtimin mjekësor paditëses.
Në verdiktin e saj gjykata është shprehur: “QSUT ka detyrimin ligjor të bëjë përllogaritjen në kohë të të gjitha nevojave që ka për medikamente dhe t’i propozojë personit të tretë për të prokuruar blerjen e tyre me qëllim që të mos mbetet asnjë periudhë kohore pa ofruar shërbimin mjekësor me medikamente”.
Rasti në fjalë përbën një rast suksesi në ndërgjegjësimin dhe edukimin e qytetarëve me të drejtat e tyre si pacientë dhe rritjen e besimit në institucionet ligjvënëse.
Burimi: Together for Life
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.