Ndryshime në Kodin Civil, mediat online do të jenë të detyruara të fshijnë komentet fyese

Disa ndryshime në Kodin Civil, synojnë të detyrojnë mediat online të fshijnë komentet fyese dhe denigruese në portalet e tyre. Ky propozim i ardhur nga deputetja e Partisë Demokratike, Majlinda Bregu, po diskutohet në komisionin e ligjeve.

Administratorët e mediave online do të kenë detyrimin të fshijnë nga faqja e tyre të gjitha komentet fyese që cënojnë nderin, personalitetin apo reputacionin e një individi, sidomos të grave dhe vajzave. Dëmet e shkaktuara nga këto publikime do të përbëjnë dëm pasuror në cënimin e nderit, personalitetit ose reputacionit të personit, dhe do i ngarkohen administratorit të portalit.

Projektligji, përcakton mënyrat dhe masat e nevojshme që duhet të ndërmerren nga administratorët e portaleve online për fshirjen në kohë të komenteve që cënojnë nderin, personalitetin apo reputacionin e një individi.

Ndërhyrjet në legjislacionin penal propozohen në një moment kur media sociale po merr gjithnjë e më shumë terren dhe çdo artikull shoqërohet nga komente të cilat në pjesën më të madhe janë denigruese dhe fyese, duke tejkaluar normat e etikës.

Ky projektligj përafron më shumë legjislacionin shqiptar me praktikën ligjore të Gjykatës Europiane të të Drejtave të Njeriut.

/BalkanWeb