Shqipëria-Progres raporti 2023/ Diskriminimi i lartë ndaj komunitetit LGBTQ+

Komisioni Evropian ka miratuar dhe publikuar të mërkurën progres raportin për Shqipërinë.

Në 134 faqe raport, Komisioni Evropian skanon të gjitha fushat e jetës, ndërsa vëmendje i kushtohet edhe çështjeve dhe të drejtave që lidhen me komunitetin LGBTQ+.

Sipas raportit: Gratë që jetojnë në zonat rurale dhe të thella, rome dhe egjiptiane, gratë dhe individët LGBTIQ përballen me akses të kufizuar në kujdesin shëndetësor parësor dhe në shërbimet e kujdesit shëndetësor seksual dhe riprodhues.

Në progres raport thuhet se diskriminimi ndaj komunitetit LGBTQ+ është shumë i përhapur në vend.

“Diskriminimi ndaj personave lezbike, gej, biseksualë, transgjinorë, interseks dhe queer (LGBTIQ) është ende shumë i përhapur në shoqërinë shqiptare, veçanërisht për sa i përket aksesit në kujdesin shëndetësor, arsim, drejtësi, punësim dhe strehim.“-thuhet ndër të tjera në raport.

Dhuna fizike ndaj komunitetit LGBTQ+ evidentohet edhe në raportin e Komisionit Evropian .

“Anëtarët e komunitetit LGBTIQ vazhdojnë të përjetojnë agresion fizik dhe gjuhë të urrejtjes, veçanërisht në mediat sociale. Shqipëria nuk ka legjislacion që njeh bashkëjetesën civile apo martesën brenda të njëjtit seks.”

Sipas raportit “Streha” për personat LGBTIQ vazhdon të ofrojë kujdes, mbështetje dhe advokim, por financimi shtetëror mbetet i pamjaftueshëm, gjë që krijon pasiguri për ofrimin e vazhdueshëm të shërbimeve.

Progres raporti thekson se ndërgjegjësimi i publikut dhe pranimi i personave LGBTIQ mbetet i ulët, veçanërisht në zonat rurale. Gjuha e urrejtjes dhe gjuha diskriminuese në media, veçanërisht në internet, dhe diskriminimi ndaj anëtarëve të komunitetit trans vazhdon dhe duhet të adresohet./ HistoriaIme