Vaksinimet e para kundër COVID-19 në vendet e Bashkimit Evropian mund të ndodhin në tremujorin e parë të 2021, sipas burimeve pranë instituconeve shëndetësore të Bashkimit Evropian.
Andrea Ammon, drejuesja e Qendrës Evropiane për Kontrollin e Sëmundjeve (ECDC), tha për Euronews se një mundësi e tillë ishte një skenar “optimist”. Komentet e saj vijnë pasi Pfizer dhe BioNTech thanë se vaksina e tyre e mundshme kishte rezultuar më shumë se 90% efektive.
Kompanitë presin që të aplikojnë për autorizim për vaksinën edhe në Administratën e Ushqimit dhe Barnave të SH.B.A.-së (FDA) përpara fundit të muajit.
Brukseli zyrtar do të nënshkruajë një marrëveshje për të siguruar deri në 300 milion doza të vaksinës eksperimentale të koronavirusit të BioNTech dhe Pfizer.
Po Shqipëria?
Përsa i përket dërgimit të vaksinës dhe jashtë kufijve të Bashkimit Evropian, Komisioni Evropian është zotuar për një shpërndarje të drejtë dhe për vendet me të ardhura të ulta e të mesme si dhe vendet e Ballkanit Perëndimor.
Deklarata të tilla janë dhënë gjatë nënshkrimit të kontratës për përfshirjen e Bashkimit Evropian në mekanizmin Covax, dhe njëkohësisht gjatë nënshkrimit të kontratës me kompaninë suedeze “AstraZeneca”, vaksina e të cilës ende nuk ka rezultate të publikuara mbi efektshmërinë e saj.
Por duket se politika e shpërndarjes së drejtë dhe të barabartë është në plan kryesor dhe për Organizatën Botërore të Shëndetësisë dhe mekanizmit të tyre “Covax”, pjesë e së cilit është edhe Shqipëria.
Covax një iniciativë e shumë vendeve dhe shumë partnerëve të rëndësishëm ndërkombëtarë në fushën e vaksinimit nën udhëheqjen e OBSH.
Shqipëria ka nënshkruar një marrëveshje për blerjen e 1 milionë e 400 mijë dozave të vaksinës së parë të aprovuar Anti-Covid për popullatën, me një shumë prej 3.9 milionë euro.
Sipas mekanizmit Covax, fillimisht pritet të furnizohen të gjitha vendet që janë pjesë e marrëveshjes me mjaftueshëm doza për të mbuluar 20% të popullësisë dhe më pas do të vijojë furnizimi me pjesën e mbetur të dozave të kërkuara.
Një proces të tillë ka lajmëruar dhe Ministrja e Shëndetësisë Ogerta Manastirliu gjatë nënshkrimit të marrëveshjes.
Momentalisht pritet aprovimi i vaksinës për përdorim emergjent nga autoritetet shëndetësore, për të nisur më pas me sfidën e madhe logjistike të shpërndarjes së saj në të gjithë botën.
Autoritetet në Evropë dhe më gjerë ndërkohë, kanë përforcuar thirrjet e tyre për respektimin e masava parandaluese dhe të rregullave të vendosura, duke qenë se dhe në muajt në vijim, situata e pandemisë nuk pritet të ndryshojë.
Për të mësuar më shumë mbi vaksinën e Pfizer dhe BioNTech, mund të lexoni artikullin në vijim:
Trending Now
Pse të mos votoni Aulon Kalanë?
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.