Margaret Keenan është qytetarja e parë britanike e cila po vaksinohet kundër Covid-19, pasi Britania e Madhe vendosi të aprovojë me procedurë urgjente vaksinën e krijuar nga Pfizer dhe BioNTech.
90 vjeçarja, e cila për disa ditë mbush 91, e konsideroi vaksinën si dhuratën e saj për ditëlindje, që do i mundësojë në javët e festave të ritakohet me familjarët e saj.
Stafi i qendrës ku ajo u vaksinua e duartrokiti Margaret në dalje, pasi ajo mori dozën e parë të vaksinës. Keenan tha se ndihej “aq e privilegjuar që ishte personi i parë i vaksinuar kundër Covid-19”.
“Kjo është dhurata më e mirë për ditëlindjen që do të mund të kërkoja, sepse kjo do të thotë që më në fund tani mund të kaloj kohë me familjen dhe miqtë e mi, pasi mu desh të jem vetëm për pjesën më të madhe të vitit,” tha ajo.
Faza fillestare e programit të vaksinimit në Britani është duke u zhvilluar në një rrjet të qendrave spitalore në të gjithë vendin. 800,000 dozat e para u shkojnë njerëzve mbi 80 të cilët janë ose në spital ose tashmë kanë caktuar takime ambulatore, së bashku me punëtorët e shtëpive të përkujdesjes për të moshuarit dhe stafet spitalore.
E ndërsa Britania nis vaksinimin në masë, vendet e tjera të botës presin ende aprovimin e vaksinës nga autoritetet shëndetësore. Në Bashkimin Evropian, aprovimi pritet të merret në fillim të Janarit, ndërsa dhe Agjencia Amerikane e Barnave ka marrë kërkesën për aprovimin e vaksinës kundër Covid-19.
Masat parandaluese, mbyllja e ekonomive dhe ora policore po kthehet në realitet për shumicën e vendeve në Evropë, ndërsa duket se masat parandaluese nuk po arrijnë të ulin numrin e rasteve të reja të infektimeve me Covid-19.
Pas thuajse 1 muaji të Gjermanisë në “lock-down”, me baret, restorantet dhe shumicën e shërbimeve të mbyllura, kancelarja gjermane Angela Merkel deklaroi se masa të reja duhen shtuar për të mbajtur në kontroll pandeminë.
E njëjta gjë po ndodh dhe në Francë, me numrat e të infektuarve që po rriten dita ditës.
Vaksina e Pfizer dhe BioNTech, që u aprovua e para në Britani, rezulton të jetë e efektshme në masën mbi 90%. Janë dhe dy vaksina të tjera që presin aprovim me një shkallë të njëjtë efektiviteti, dhe dhjetëra të tjera që po përmbyllin fazën e fundit të testimit.
Viti 2021 do jetë viti i shfaqjes së sfidave logjistike të shpërndarjes së vaksinave, në pritje të rikthimit të ngadaltë dhe gradual drejt normalitetit të para-pandemisë.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.