Duke filluar nga 1 shkurti nis aplikimi i recetës elektronike. Mjekët në Qendrat Shëndetësore të Tiranës nuk do të përdorin më recetën letër për barnat e rimbursueshme, por vetëm atë elektronike.
Si funksionon receta elektronike?
Kur pacienti drejtohet tek mjeku i familjes me kartën e shëndetit për të marrë recetën me rimbursim, mjeku i familjes pasi bën verifikimin e diagnozës, i nis elektronikisht farmacisë recetën dhe pajis pacientin me një kod 5 shifror. Farmacisti identifikon pacientin me kartën e shëndetit dhe me kodin 5-shifror që ai paraqet.
Kështu receta elektronike bëhet e vlefshme si dokument shëndetësor, duke eliminuar printimin, firmosjen dhe vulosjen e saj.
Sipas Ministrisë së Shëndetësisë, aplikimi i recetës elektronike ul shanset për korrupsion në barnat e rimbursueshme si dhe rrit transparencën.
Fillimisht aplikimi do të nis në Tiranë dhe deri në fund të 2017-ës do të shtrihet në të gjithë Shqipërinë.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.