Rruga e rrezikshme që po merr Evropa 

Pse komuniteti LGBTQ+ është “nën sulm” anembanë kontinentit

Nga Isa Myzyraj

Krahas vendeve si Hungaria, Turqia e Polonia të cilat qeveritë e tyre janë hapur kundër komunitetit LGBTQ+, vendet e perëndimit që janë konsideruar vazhdimisht si më të përparuara kanë parë vitet e fundit një goditje të të drejtave LGBTQ+.

Nga Giorgia Meloni në Itali, tek Rishi Sunak në Britani të Madhe dhe situata e brishtë e të drejtave të njeriut në Ballkanin Perëndimor të drejtat LGBTQ+ janë nën sulm në shumë vende.

Ish-Presidenti i Shteteve të Bashkuara të Amerikës Donald Trump i dha një goditje të madhe të drejtave trans ndërsa qasja e tij u kritikua gjerësisht nga aktivistët e të drejtave të Njeriut, gjatë Kohës që ai ishte në pushtet.

Në Serbi grupet ekstremiste të të lidhura me kishën kanë mjaft ndikim në qeverinë atje, ndërsa vazhdimisht ata kanë shantazhuar, kërcënuar madje edhe sulmuar aktivistët LGBTQ+ të cilët jetojnë nën kushte të rënda të sigurisë.

HistoriaIme ka mbledhur opinionet e të rinjëve në disa vende të evropës për atë që po kërcënon më së shumti të drejtat LGBTQ+ në këtë kohë.

Irniel, 25 nga Kanadaja që jeton në Belgjikë shprehet se ekstremet e djathta janë një ndër rreziqet më të mëdha me të cilat po përballen aktivistët.

“Unë do të thoja se situata varet nga vendi. Natyrisht, disa vende si Italia kanë parë të drejtat e LGBTQ+ të zvogëlohen masivisht. Vende të tjera si Belgjika ku unë jetoj vendosin ligje dhe masa për njerëzit queer që janë të mira, por definitivisht jo të mjaftueshme. Megjithatë, pavarësisht se çfarë është vendosur ligjërisht, ne po shohim tani një nxitje të lëvizjeve të ekstremeve që është shumë shqetësuese dhe që do të vijë pashmangshmërisht edhe në vendet më të privilegjuara. Është tani ose kurrë koha për të edukuar rininë në mënyrë që të mund të jemi të fortë së bashku kundër atyre ideologjive të të drejtave ekstreme, queerfoboike, transfobike, raciste, mizogjene etj.”

Në një deklaratë të paprecedentë Kryeministri i Britanisë së Madhe Rishi Sunak sulmoi komunitetin trans në fillim të tetorit.

“Një burrë është një burrë, dhe një grua është një grua, kjo është thjesht arsye e shëndoshë,” tha ai në një deklaratë që u kundërshtua gjerësisht nga aktivistët në Britani.

Josh, 29 vjeç, nga Britania e Madhe shprehet se: Të drejtat e LGBT+ kanë rënë në mënyrë dramatike në Mbretërinë e Bashkuar gjatë pesë viteve të fundit. Ne kemi parë një rritje të retorikës transfobike në median tonë dhe qeverisë së krahut të djathtë. Kjo ka çuar në një rritje të krimit të urrejtjes kundër LGBT+, sfida në rritje për njerëzit queer që hyjnë në mënyrë të sigurt në hapësirat publike dhe një mjedis ku ekzistenca e identiteteve trans është vazhdimisht në diskutim .

Kur Giorgia Meloni erdhi në krye të qeverisë Italisë në 2022 ajo ishte e para grua në krye të Italisë.

Mediat më të mëdha në botë e quajtën atë si “fashiste” për shkak të ideve të saj, ndërsa paralajëruan se të drejtat e njeriut veçanërisht LGBTQ+ do të pësojnë goditje.

Dhe kështu ndodhi!

Alberta, 23 vjeç jeton në Romë ndërsa është aktiviste e komunitetit LGBTQ+ dhe shprehet se: Është tërësisht e trishtueshme ajo që po ndodh në Itali. Kush e mendonte se në Italinë tonë të bukur mund të viheshin në diskutim të drejtat LGBTQ+? Por, Meloni i dha një goditje frontale këtyre të drejtave, ndaj ne mendojmë se është koha për mobilizim, jo vetëm në Itali, por duket një koalicion më i gjerë për tu bërë ballë këtyre sulmeve.
Aktivistët në mbarë Evropën duhet të gjejnë mënyra bashkëpunimi për të mos lejuar që të drejtat e Njeriut të thyhen të vihet në diskutim ajo që kemi arritur deri më tani. Padyshim mendoj se partitë e ekstremit të djathtë në Evropë, që fatkeqësisht janë duke u rritur janë një ndër rreziqet më të mëdha për të Drejtat e Njeriut në përgjithësi.”

Nën udhëheqjen e Rexhep Taiyp Erdogan Turqia ka parë vetëm regres sa i përket të drejtave LGBTQ+.

Aktivistët atje janë dhunuar, janë burgosur, janë sulmuar dhe janë stigmatizuar vit pas viti. Policia e dhunshme është përdorur nga pushteti i Erdogan për të shtypur paradat e krenarisë dhe për të ndaluar me qindra aktivitete LGBTQ+ anembanë vendit.

Ozge nga Ankaraja kërkon më shumë presion ndërkombëtar ndaj qeverisë së saj në mënyrë që komuniteti LGBTQ+ “të marrë frymë”.

“Erdogan është duke përdorur çdo instrument për tua bërë më të vështirë jetën personave LGBTQ+ në vendin tim.
Politikat represive, dhuna dhe shtypja janë në nivele shqetësuese. Drejtuesit e shtetit atje flasin vazhdimisht me një gjuhë agresive për komunitetin, ndërsa mediat janë nën presion të vazhdueshëm për të ndaluar çdo transmetim që lidhet me ne. Evropa duhet të drejtojë gishtin e përgjegjësisë nga aleati i tyre, presidenti ynë, Erdogan. Bashkimi Evropian duhet t’ia bëjë të qartë atij (Erdoganit) se vlerat e Bashkimit Evropian nuk janë dhuna dhe shtypja, por liria.”-shprehet Ozge.

Zgjedhjet europiane të vitit 2024 do të jetë një nga ngjarjet më të rëndësishme në historinë e bashkimit tonë, deklaroi presidentja e Komisionit Evropian, Ursula von der Leyen, në një videomesazh të transmetuar në nisje të konferencës “Votimi për të ardhmen e Evropës”, këtë javë në Bruksel.

”Nuk do të lejojmë që autokracitë të sulmojnë demokracitë nga brenda”, tha presidentja e Komisionit Evropian Von der Leyen.

Louise, 28 vjeç jeton në “zemrën” e Evropës, në Bruksel ndërsa shprehet për HistoriaIme, se ajo dhe kolegët e saj aktivistë e shohin me shqetësim të ardhmen e Evropës, pikërisht për shkak të rritjes së mbështetjes së partive të ekstremit të djathtë.

“Ne po shohim Hungarinë e cila ka rrëshqitur në një regjim autokratik, Italinë që po merr masa drastike kundër komunitetit LGBTQ+, dhe për fatin e keq të dyja këto vende janë anëtare me të drejta të plota të Bashkimit Evropian. Shtete e udhëheqës autokratë kanë në dorë fatet e rreth 450 milionë njerëzve që jetojnë në Bashkimin Evropian, dhe kjo është një shenjë e keqe, një këmbanë alarmi për Evropën e së nesërmes dhe një thirrje zgjimi për zërat e arsyeshëm në parlamentin dhe komisionin Evropian. Duhet bërë gjithçka, që të frenohet rritja e këtyre partive ekstremiste që janë sot turpi i përbashkët i evropës sonë”-thotë Louise./HistoriaIme