Shqetësuese/ Hungaria miraton ligjin anti-LGBT

Parlamenti i Hungarisë miratoi të martën një ligj, që ndalon shpërndarjen e përmbajtjes që mendohet se promovojnë homoseksualitetin dhe ndryshimin gjinor në shkolla, midis kritikave të forta nga grupet e të drejtave të njeriut dhe partitë e opozitës.

Kryeministri i linjës së ashpër nacionaliste Viktor Orban, i cili përballet me zgjedhje vitin e ardhshëm, është bërë gjithnjë e më radikal në politikën shoqërore, duke shtuar sulmet kundër njerëzve LGBT dhe emigrantëve, në regjimin e tij të vetëquajtur jo-liberal, i cili ka ndarë thellësisht hungarezët.

Partia e tij Fidesz, e cila promovon një axhendë të krishterë-konservatore, hodhi poshtë propozimin që ndalon bisedimet në shkollë për çështjet LGBT (lezbike, homoseksuale, biseksuale dhe transgjinore) në një projekt-ligj të veçantë, të mbështetur gjerësisht që penalizon në mënyrë rigoroze pedofilinë, duke e bërë shumë më të vështirë për kundërshtarët për të votuar  kundër tij.  

Masa, e cila kritikët thonë se lidh gabimisht pedofilinë me çështjet LGBT, shkaktoi një tubim masiv jashtë parlamentit të hënën, ndërsa disa grupe të të drejtave i kanë bërë thirrje Fidesz të tërheqë projekt-ligjin.  

 Ligjbërësit e Fidesz mbështesin me shumicë dërrmuese legjislacionin të Martën, ndërsa partitë e majta të opozitës bojkotuan votimin.

 Sipas ndryshimeve të paraqitura në projekt-ligj javën e kaluar, personave nën 18 vjeç nuk mund të tregohet ndonjë përmbajtje që inkurajon ndryshimin gjinor ose homoseksualitetin.  Kjo vlen edhe për reklamat.  Ligji përcakton një listë të organizatave të lejuara për të ofruar arsim në lidhje me seksin në shkolla.

Ambasada Amerikane në Budapest gjithashtu reagoi pas prezantimit të projekt-ligjit, duke thënë se ishte “thellësisht e shqetësuar” për aspektet anti-LGBTI+ të legjislacionit.

“Shtetet e Bashkuara qëndrojnë për idenë që qeveritë duhet të promovojnë lirinë e shprehjes dhe të mbrojnë të drejtat e njeriut, duke përfshirë të drejtat e anëtarëve të komunitetit LGBTQI +,” tha ajo në një deklaratë në faqen e saj të internetit.

Martesa homoseksuale nuk njihet në Hungari dhe vetëm çiftet heteroseksuale mund të birësojnë ligjërisht fëmijë.  Qeveria e Orban ka ripërcaktuar martesën si bashkimin midis një burri dhe një gruaje në kushtetutë dhe ka kufizuar birësimin për personat homoseksualë.

Kritikët kanë bërë një paralele midis legjislacionit të ri dhe ligjit rus të vitit 2013 që ndalon përhapjen e “propagandës mbi marrëdhëniet seksuale jo-tradicionale” midis të rinjve rusë.

Vala e intolerancës brenda Bashkimit Evropian

Një vijë të ngjashme ideologjike po ndjek dhe Partia konservatore në pushtet e Polonisë, Ligji dhe Drejtësia (PiS), aleati kryesor i Fidesz në Bashkimin Evropian.

Kjo parti, e cila ka qenë partia kryesore udhëheqëse në Poloni që prej vitit 2015, ka marrë një qëndrim të ngjashëm kritik për çështjet LGBT. 

Budapesti dhe Varshava janë në kundërshtim me Bashkimin Evropian rreth disa prej reformave të tyre konservatore.

Së fundmi Polonia kaloi një ligh të ashpër anti-abort, i cili ndaloi abortimin pothuajse tërësisht për gratë. Qeverisja e Ligj dhe Drejtësi në Poloni që prej vitit 2015, ka ndërmarrë një sërë reformash jo-progresive, duke akuzuar vazhdimisht Brukselin për ndërhyrje në politikën e brendshme të vendit dhe duke u përpjekur për kapjen e gjyqësorit përmes reformave të ndryshme në Gjykata.

Reforma të ngjashme dhe intoleranca kundër LGBTI+ ka qenë së fundmi dhe në vende të tjera anëtare të BE-së, si Sllovakia apo Sllovenia, ku autoritetet po përpiqen të kufizojnë të drejtat e këtij komuniteti dhe po cënojnë lirinë e shtypit dhe të shprehjes.

Raportuesi i Parlamentit Evropian për situatën në Hungari, ligjvënësja e të Gjelbërve Gwendoline Delbos-Corfield, kritikoi të martën ligjin e ri në Hungari. Ajo deklaroi se: “Përdorimi i mbrojtjes së fëmijëve si një justifikim për të synuar njerëzit LGBTIQ është dëmtues për të gjithë fëmijët në Hungari”.

Orban ka fituar tre palë zgjedhje të njëpasnjëshme zgjedhore që nga viti 2010, por partitë e opozitës tani kanë bashkuar forcat për herë të parë dhe janë afër me Fidesz në sondazhet paraprake./ HistoriaIme