Rradhët e gjata në kufirin me Greqinë, nga sot karantina 1 javore e detyruar

Pas njoftimit të rregullave të reja për të hyrë në territorin e Greqisë, ku nga dita e sotme do të aplikohet karantina e detyruar një javore për të gjithë emigrantët rezidentë që kthehen nga Shqipëria, numri i lartë i familjeve dhe shtetasve shqiptarë që u nisën drejt pikave kufitare shkaktoi rradhë të gjata që arrinin deri në 25 kilometra, tension dhe madje dhe viktima.

Në mëngjesin e së shtunës, një fëmijë 10 vjeç ka humbur jetën pasi u përplas nga një ambulancë në afërsi të fshatit Bularat.

Ekipet mjekësore kanë trajtuar me dhjetëra qytetarë, ndërkohë që autoritetet greke, pavarësisht lëshimeve të dy ditëve të fundit, refuzojnë të heqin kufizimin e numrit të personave që mund të hyjnë brenda një dite, përkatësisht 750 persona në ditë në Kakavijë dhe 300 në Kapshticë. Gjithashtu vazhdon të qëndrojë si kusht bërja e testit të covid19 në kufi, i cili ngadalëson shumë procedurat kufitare për të hyrë në territorin grek.

Autoritetet shqiptare bëjnë thirrje për shtyrje të datës së kthimit për qytetarët që kanë mundësi të qëndrojnë ende në Shqipëri, duke paralajmëruar dhe ngritjen e post-blloqeve pranë kufirit për të reduktuar numrin e makinave dhe personave që shkaktojnë dhe rradhë të gjata dhe përkeqësojnë më tej gjendjen.

Për tu futur në territorin grek, nevojitet një dëshmi e tre ditëve të fundit për kryerjen e testit PCR (me tampon) për COVID-19, ku rezultati të jetë negativ. Për arsye dokumentesh testi mund të kryhet vetëm në klinika private dhe kushton 100 euro për person.

Rezultati i testit duhet përkthyer në anglisht, në të cilin të jetë shënuar emri, mbiemri dhe numri i pasaportës/kartës së identitetit së personit që udhëton. Njëkohësisht nevojitet një kopje e plotësimit të formularit të posaçëm PFL me kodin përkatës nga adresa elektronike e autoriteteve greke.

Prej datës 13 gusht e deri në mbylljen e doganave në orën 01:00 të 17 gushtit, në dy pikat doganore me Greqinë kanë kaluar rreth 13 mijë persona dhe 4,000 makina.

Situata e pandemisë dhe rregullat e momentit të fundit kanë shkaktuar tension te qytetarët e shumtë që kishin ardhur në Shqipëri me pushime, duke akuzuar autoritetet për neglizhencë.

Ministria e Mbrojtjes njoftoi herët në mëngjes se nisur nga sot, kalimi në Kakavijë do te kryhet përmes regjimit të ri të masave me kuotat e reja, aplikimin dhe testin negativ të Covid 19.