Ndryshimi i klimës, Indonezia planifikon ndërtimin e një kryeqyteti të ri

Një zonë e mbuluar nga xhungla në lindje të ishullit Borneo është vendosur të shndërrohet në kryeqytetin e ri të Indonezisë.
Shqetësimet për qëndrueshmërinë e Xhakartës si qendër politike dhe ekonomike e vendit, nxitën nevojën për planifikimin e një kryeqyteti të ri.

Zhvendosja u njoftua të hënën nga Presidenti Joko Widodo.
Vendndodhja e propozuar, afër qyteteve relativisht të pazhvilluara të Balikpapan dhe Samarinda, është relativisht larg nga Xhakarta, që i ka shërbyer si zemër financiare Indonezisë që nga viti 1949. Widodo e pranoi që zhvendosja e kryeqytetit në ishull do të ishte një ndërmarrje e shtrenjtë dhe e vështirë.

Zgjerimi i shpejtë i Xhakartës në vitet e fundit ka paraqitur një mori shqetësimesh mjedisore, ekonomike dhe sigurie, duke bërë që qeveria të shikojë diku tjetër dhe të lehtësojë mbipopullimin në metropolin masiv.
Përmbytjet e shpeshta, shirat, tërmetet dhe fenomenet ekstreme të klimës e kanë kthyer Xhakartën në një qytet thuajse të pabanueshëm për popullsinë e saj prej 10 milionë banorësh, e cila është vazhdimisht në rritje.

Sipas studimeve Xhakarta është gjithashtu një nga qytetet me fundosjen më të shpejtë në Tokë, sipas Forumit Ekonomik Botëror, duke u fundosur në Detin Java me një normë alarmante për shkak të ekstraktimit të ujërave nëntokësorë.

Qyteti kufizohet me një moçal dhe përqafon detin në veri, duke e bërë atë veçanërisht të prirur për përmbytje.
Një krizë e shtimit të ndotjes së ajrit, e përkeqësuar nga bllokimet e trafikut pothuajse të vazhdueshëm në rrugët e saj, është rritur aq e ashpër sa disa banorë paditën qeverinë indoneziane në korrik.

Asnjë emër nuk është dhënë për kryeqytetin e ri, por qeveria fillimisht njoftoi planet për zhvendosjen e tij në Prill. Masa kërkon që vendimi të miratohet dhe nga Parlamenti për të filluar dhe zhvendosjen graduale të banorëve dhe selive të institucioneve dhe bizneseve të mëdha. / kj

Burimi: CNN