Krijohet për herë të parë Dhoma Ekonomike e Gruas!

Është krijuar për herë të parë në vendin tonë, Dhoma Ekonomike e Gruas.

DHEG, është një nismë e grave sipërmarrëse, me profesione të ndryshme, ndërsa kryetarja e kësaj Dhome Antonela Hako thotë se, kjo nismë synon të fuqizojë gruan, familjen dhe ekonominë shqiptare.

Anëtaret e bordit të kësaj dhome thonë se, qëllimi i shoqatës është mbrojtja e interesave ekonomike dhe sociale të grave sipërmarrëse, profesioniste dhe të vetëpunësuara në të gjitha fushat. Dhoma parashikon të ofrojë shërbime, që nxisin zhvillimin ekonomik e social të tyre, promovim dhe mundësi bashkëpunimi veprimtari promovuese dhe zhvilluese, bashkëpunime kombëtare dhe rajonale, studime, botime, projekte dhe konsulenca.

Bordi drejtues i Dhomës përbëhet nga gra të suksesshme në tregun e prodhimit dhe shërbimeve në vend, si dhe konsulente në fushën e sipërmarrjes. Ato janë:

Antonela Hako, është drejtuese e kompanisë Hako. Karriera e saj nis me studimet në ekonomi. Në vitin 1990 ajo angazhohet me punë pranë qendrës së informatikës ekonomike në Tiranë. Pas emigrimit, 4 vite në Greqi, rikthehet në Shqipëri për t’u marrë me biznes.

Sot, Antonela Hako dhe familja e saj, kanë mbi 200 të punësuar, duke mbuluar me shërbime të gjithë territorin e vendit, ndërsa kanë nisur projektin e zhvillimit edhe në Kosovë.

Antoneta Ndreka, Presidente nderi Sipërmarrëse e Lufras, me detyrë mbi 20 vjeçare në menaxhimin e cilësisë pranë Lufra-s, planifikimin e menaxhimin e burimeve njerëzorë dhe planifikimin e prodhimit.

Ajo ka ndjekur kurse për teknika dhe procese të ndryshme të prodhimit të qumështit UHT, të marra në disa module në Itali në grupin Parmalat. Përmes USAID / Partnerët, ajo bëhet pjesë e disa programeve kualifikimi fokusuar tek drejtuesit e industrisë së qumështit.

Albana Muçaj, gazetare e çështjeve ekonomike dhe eksperte në fushën e komunikimit, prej 4 vitesh drejton edhe qendrën Multifunksionale Kallz. Sipërmarrje e fokusuar në shërbimet për fëmijët, prindërit, familjen. Krahas programit pas shkolle, kurseve dhe programeve verore dhe dimërore për fëmijë e të rritur, Albana vjen edhe me një media dedikuar prindërve dhe fëmijëve, Revista Kallz.

Alida Kondi, e diplomuar në fushën e ekonomisë në manaxhim turizmi dhe administrim publik, ka një përvojë 30 vjeçare në zhvillimin e SME-ve, politikave të SME-ve, zhvillimit të turizmit, organizatave të biznesit dhe konsulencës. Prej 9 vitesh, Alida është drejtore themeluese dhe financuese e organizatës jo-fitimrurëse “Qendra për Promovimin e Konkurrueshmërisë”, me focus zhvillimin e SME-ve, sipërmarrjes dhe zhvillimit të biznesit social dhe shoqërisë civile.

Irena Toçi, prej 10 vitesh drejton Shtëpinë Botuese Toena në Tiranë, një nga shtëpitë botuese më të mëdha në vend, me një aktivitet të spikatur në fushën e botimit dhe të promovimit kulturor. Ajo është vlerësuar ndër vite nga institucione të ndryshme për kontributin e saj në këtë fushë. Irena ka përkthyer disa libra dhe ka punuar në cilësinë e kryeredaktores.

Klodiana Ajazi ka një fokus, motivim dhe vizion të qartë në arritjen e objektivave. Ajo ka një experiencë të gjatë në shitje dhe marketing në kompanitë dhe koorporatat më të mëdha në vend. Klodiana ka mbajtur pozicione të rëndësishme drejtuese në zhvillim biznesi, falë aftësive të mira drejtuese dhe në shitje. Aktualisht ka themeluar dhe drejton kompaninë Inovest, me fokus menaxhim projekti në sektorin e ndërtimit. Ajo është gjithashtu edhe bashkëthemeluese dhe drejtuese në agjencinë e marketingut Novus. Në të dy këto biznese sjell një frymë të re menaxhimi dhe vlera për klientët.

Valbona Begolli, themeluese dhe drejtuese e kompanive Albpastrim, Albsolution dhe Albacademy. Ajo ka sjelle risi në fushën e shërbimeve. Kontributi i saj është në fuqizimin e kapaciteve në tregun e punës me rezultat të trefishtë: rritja e cilësisë së shërbimit për klientin, fuqizimi i kompanisë ku ai punon dhe përmirësimi i karrierës së tij. Begolli është konsulente pranë BERZH për zhvillim biznesi.

Ylldise Brahimaj, është Drejtore Ekzekutive e VRDA Foundation. Ajo është eksperte në Menaxhimin e Projekteve dhe Zhvillimin e SME-ve në:  EU-SME project, EBRD,USAID,UNDP,GIZ  WEB4YES. Kualifikimet e saj janë në menaxhimin dhe ekspertizën e SME-ve, /Trainim/coaching /Mentorim, e specializuar në disa fusha të biznesit. Brajhimaj është eksperte e jashtme pranë Delegacionit Europian në Shqipëri, për “Konkurrueshmëri, biznes, inovacion dhe tregti”.