Fitorja e partive të opozitës në Kosovë, shpresë për ndryshimin e kursit politik

Me mbi 97% të votave të numëruara, Lëvizja Vetëvendosje dhe Lidhja Demokratike e Kosovës, siguruan shumicën e votave në një rezultat të pritshëm, i cili dërgon Partinë Demokratike në opozitë pas më se 8 vitesh qeverisje.

Në ditët në vijim, pritet të fillojnë bisedimet për krijimin e një koalicioni qeveritar mes LV dhe LDK, të cilët së bashku arrijnë të sigurojnë 61 vota në parlament. Së bashku me partitë e vogla të minoriteteve, qeveria e re e Kosovës ka mundësi të sigurojë një shumicë të mjaftueshme në parlament për zbatimin e programeve përkatëse të partive fituese.

Mediat ndërkombëtare e konsiderojnë fitoren e Lëvizjes Vetëvendosje si historike, me një prej drejtuesve të lëvizjes studentore në Kosovë i cili pritet të bëhet kryeministër.

Taksa e mallrave Serbe, pritet të jetë tema e parë e nxehtë me të cilën do të përballet qeveria e re. Albin Kurti, në një intervistë për Euronews deklaroi se marrëdhëniet me Serbinë do të kenë bazë reciprocitetin. Presioni i ndërkombëtarëve për heqjen e taksës, do të vijojë të mbetet kërkesë me të cilën LDK dhe LVV do të përballen në rast të krijimi të një koalicioni të mundshëm qeveritar.

Korrupsioni në administratë, marrëdhëniet me Serbinë, gjyqësori, politikat sociale dhe punësimi, janë pikat kryesore ku u fokusuan programet e partive politike në zgjedhjet e fundit.

Biseda për koalicion do të fokusohet dhe te rolet përkatëse që do të marrin Albin Kurti dhe Vjosa Osmani në kabinetin e ri qeveritar, pasi bisedimet parazgjedhore dështuan pikërisht për përcaktimin e emrit të kanditatit të përbashkët për kryeministër.

Me një qeveri të re që pritet të krijohet javët e ardhshme, pritet një ndryshim i kursit të politikave në Kosovë, qoftë në lidhje me Serbinë dhe qasjen ndaj ndërkombëtarëve, dhe deri te politikat e brendshme dhe reformat e vështira me të cilat vendi duhet të vijojë progresin dhe të shtojë numrin e njohjeve ndërkombëtare.

vijon.