Azilkërkuesit, ambasadori gjerman: 999 shqiptarë nga 1 mijë do të kthehen

­Ambasadori Gjerman Helmut Hoffman deklaron nga Berati se të gjithë emigrantët që kanë shkuar në Gjermani për të kërkuar azil politik do të kthehen. “999 shqiptarë nga 1 mijë të tillë që kanë shkuar në Gjermani do të kthehen. Emigrantët janë pothuajse të gjithë për arsye ekonomike. Procedurat e verifikimit zgjasin nga 3­5 muaj. Do u refuzohet azili për arsye ekonomike”­ sqaron ambasadori.

Hoffman e cilëson shokuese deklaratën e deputetes italiane Daniela Santanche. Sipas saj, Italia duhet të fundosë gomonet që në nisje, ashtu siç bëri me shqiptarët. “Më mirë një akt lufte, se sa një luftë e humbur”, u shpreh deputetja italiane në televizion. Deklarata e saj u bë pas tragjedisë së të dielës, ku kanë humbur jetën jo më pak se 950 persona. Deklarata e deputetes italiane ka shokuar mbarë opinionin publik dhe është bërë objekt debatesh të shumta. Ambasadori Hoffman thekson se nuk mund të flitet për deklarata të tilla.