150 liderë fetarë zotohen të mbrojnë jetët e LGBT+ në një marrëveshje ‘revolucionare’

Teksa në Shqipëri dhe në vendet e rajonit, gjuha homofobike, kryesisht nga personat dhe krerët e besimeve fetare është intensifikuar, bota ecën para dhe jep një shembull bashkimi, dhe pranimit të qenies njerëzore pavarësisht orientimit seksual dhe identitetit gjinor.

Më shumë se 150 liderë të lartë fetarë nga e gjithë bota janë zotuar të mbrojnë personat LGBT+ në komunitetet fetare.

Grupimi “revolucionar” përcaktoi parime mbrojtëse në konferencën e vitit 2022 të Komisionit Global Ndërfetar mbi Jetët LGBT+ të martën (22 mars).

Udhëheqësit e besimit nga 30 vende morën pjesë në konferencë, duke përfshirë Kryepeshkopin Anglikan të Kanadasë, Kryerabinin e Polonisë dhe ish-Presidentin e Irlandës, Dr. Mary McAleese.

Grupi diskutoi kërkimet e bëra kohët e fundit mbi praktikat e terapisë së konvertimit në Karaibe dhe Hungari dhe gjetjet e tij, duke përfshirë “nivelet dukshëm më të larta të tentativave për vetëvrasje, mendimet vetëvrasëse dhe vetëdëmtimin e përjetuar” nga të mbijetuarit.

Si përgjigje, më shumë se 150 udhëheqës fetarë ranë dakord për gjashtë parime të dizajnuara për të mbrojtur personat LGBT+ në komunitetet fetare.

Ish-peshkopi i Liverpool-it dhe tani bashkë-kryetar i Komisionit Global Ndërfetar mbi Jetët LGBT+ Reverend Paul Bayes tha në një deklaratë: “Kjo është një ngjarje e rëndësishme ku ne po mbledhim udhëheqës të lartë besimi, akademikë dhe liderë laikë nga e gjithë bota që duan të punojnë së bashku për të mbrojtur jetën e personave LGBT+.

“Për një kohë të gjatë, shumë njerëz të pafajshëm kanë mbetur krejtësisht të pambrojtur, pa askënd për t’iu drejtuar për ndihmë. Tani jemi duke u bashkuar për të mbrojtur kauzën e tyre dhe për të siguruar që ky abuzim, i cili ka vazhduar për një kohë shumë të gjatë, të ndalojë.”

“Kjo është arsyeja pse ne kemi rënë dakord për një sërë parimesh mbrojtëse “-shtoi ai.

Drejtoresha e Komisionit Global Ndërfetar për Jetët LGBT+, Jayne Ozanne, e cila koordinoi nisjen e komisionit në vitin 2020, tha se: “Parimet, pasi të miratohen, janë revolucionare dhe do të transformojnë jetën e mijëra personave LGBT+ nga Afrika në Australi dhe nga Azia në Argyll.”

Parimet e rëna dakord janë:

“Fuqizimi – Ne besojmë se të gjithë individët janë krijuar sipas shëmbëlltyrës së Zotit, të cilin shumë e quajnë Hyjnor, dhe duhet të jenë të lirë për të jetuar një jetë dinjitoze, në përputhje me seksualitetin dhe identitetin e tyre gjinor brenda komuniteteve të tyre fetare, pa frikë apo gjykim.

“Parandalimi – Ne besojmë se kemi një detyrë të kujdesemi ndaj të gjithë personave LGBT+ dhe prandaj angazhohemi të dëgjojmë përvojat e anëtarëve tanë LGBT+ në mënyrë që të identifikojmë dhe zhdukim çdo praktikë të dëmshme që pengon përparimin e të gjithëve ne.

“Proporcionaliteti – Ne e kuptojmë se për një kohë të gjatë nevojat e anëtarëve tanë LGBT+ shpesh janë injoruar dhe anashkaluar, dhe kështu ne angazhohemi të sigurojmë që personave LGBT+ t’u jepet gjithmonë një zë i drejtë.

“Mbrojtja – Ne e pranojmë se shumë njerëz LGBT+ përballen me diskriminim, refuzim dhe urrejtje të konsiderueshme, dhe kështu ne angazhohemi të punojmë për të mbrojtur të gjithë personat LGBT+ nga dëmtimi, kudo që ndodh si në kontekstin fetar ashtu edhe në atë laik.

“Partneriteti – Ne e kuptojmë se për një kohë të gjatë ata prej nesh që janë LGBT+ janë përjashtuar nga vendimet që ndikojnë në jetën tonë dhe kështu ne angazhohemi të punojmë gjithmonë në partneritet në mënyrë që së bashku të mund të parandalojmë, zbulojmë dhe raportojmë abuzimin shpirtëror.

“Përgjegjshmëria – Ne besojmë se askush nuk është mbi ligjin dhe se duhet të ketë gjithmonë transparencë në të gjitha fushat e mbrojtjes dhe kështu të angazhohemi të punojmë me anëtarët tanë LGBT+ për të monitoruar rregullisht progresin.”./ HistoriaIme- Pinknews.co.uk