“Thuaja emrin”, një thirrje për të gjitha gratë e vrara nga dhuna patriarkale

Ditën e sotme, një grup aktivistësh feministë u mblodhën në sheshin e qytetit të Elbasanit për të marshuar më pas drejt gjykatës, në pragun e institucionit ku gjeti vdekjen një grua, një tjetër grua në Shqipëri.

Thuaja emrin: Liljana Buzo! Përsërite sërish: Liljana Buzo u vra përpara derës së gjykatës, në një institucion të cilin ajo e kish besuar. Liljana u vra nga ish-bashkëshorti, teksa tentoi për herë të fundit të çlirohej nga dhuna sistematike. Ajo ia doli të kërkojë ndihmë, dështuan institucionet dhe shoqëria për ta mbrojtur.

Thuaja përsëri emrin: Liljana Buzo. Dhe jo vetëm ajo, thuaj sërish bashkë me mua emrat: Dorina Alla, Fëllënza Shirja, Irvana Hyka Medinaj, Kristina Bardhi dhe Zhaneta Metani. Vetëm këtë vit janë vrarë gjashtë gra nga ish-bashkëshortët/partnerët e tyre.

“Liljana pati emër, fytyrë, dëshira, ëndrra, të drejta, sikurse Irvana Hyka Demiraj, Fëllënza Shirja, Dorina Alla, Kristina Bardhi dhe Zhaneta Metani. Gra. Gjashtë gra. Gjashtë jetë të ndërprera nga dhuna patriarkale vetëm në 2021. Gjashtë krime”, lexon Gresa Hasa.

Marshojmë dhe përsërisim: shoqëria dështon të na e dëgjojë klithmën për ndihmë. Ndalojmë në vendin ku ndodhi krimi. Disa lule dhe bllokim trafiku. I bëmë një homazh të ndjerës Liljana Buzo dhe kujtojmë Zhaneta Metanin, Irvana Hyka Demiraj, Fëllënza Shirja, Dorina Alla dhe Kristina Bardhin.

Kryerja e homazhit bllokon qarkullimin e makinave. Kjo sjell irritim dhe paqartësi te kalimtarët. Askush nuk pyet se çfarë po ndodh. Zëri i lartë i megafonit u tregon se nuk do t’u lirohet rruga, ndaj ata mund të zgjedhin t’i bashkohen protestës.

 “Dilni nga makina dhe solidarizohuni me gratë e vrara. Solidarizohuni për gratë që jetojnë, që të mos jenë më pjesë e emrave që kanë humbur jetën në këtë vend si pasojë e dhunës në familje. Dilni dhe tregojeni që nuk jeni si ata, tregoni që jeni në mbështetje dhe për drejtësi për gratë e vrara dhe gratë që jetojnë”, kumbon zëri i Liri Kuçit. Buritë vazhdojnë të bien, aktivistet refuzojnë të lirojnë rrugën. Apati.

“Ne nuk lëvizim nga këtu. Nëse të gjithë burrat që janë në makina në këto momente, ndjehen të shqetësuar sepse gratë kanë zënë hapësirën publike, ju duhet ta kuptoni që gratë ndjehen kështu 365 ditë të vitit prej jush”, jehon sërish zëri i aktivisteve.

Disa minuta kaos dhe vijon marshimi. Asnjë qytetar nuk i bashkohet protestës. Apati dhe zemërim.

Çfarë do të thotë “drejtësi për gratë”?

Gjykata e Elbasanit qëndron përballë grumbullit të protestuesve. Aktivistja Liri Kuçi mban në duar një letër të bardhë, e shënjuar me bojë të kuqe. Në të shënohet emri i Liljana Buzos.

“Çfarë domethënë drejtësi për gratë e vrara? Domethënë që vrasësit të marrin dënimin maksimal, më pas me fëmijët e të ndjerave të kenë kujdes psikologjik, sociologjik dhe ndjekje të posaçme në infrastrukturën shkollore”, buçet zëri i Lirisë.

Po drejtësi për gratë që jetojnë, çfarë do të thotë?

“Që shteti të bëhet garant që jeta e tyre të mos jetë e kërcënuar në rrugë, në shtëpi, në punë, në shkollë, gjithandej”, përgjigjet Liri Kuçi.

E kur shteti nuk na mbron, çfarë na takon ne të bëjmë?

“Prandaj, thirrjes për solidarizim na takon që t’i bashkohemi të gjithë. Edhe burra edhe gra. Një shoqëri më e shëndetshme është kur burrat dhe gratë janë të vetëdijshëm që jeta na kushton njëlloj, që jeta vlen njëlloj”, përfundon Kuçi.