Shtetet e Bashkuara janë fituesit e Kampionatit Botëror të Futbollit për Femra edhe për këtë vit. Skuadra amerikane mundi Holandën, kampionen e Europës, në ndeshjen finale që u zhvillua në Lion të Francës, me rezultatin 2-0, duke siguruar titullin kampion për të katërtën herë.
Një nga lojtaret më të mira amerikane, Megan Rapinoe, që i hapi rrugën për fitore skuadrës amerikane në gjysmëfinale ndaj skuadrës britanike, shënoi golin e parë për amerikanët në një gjuajtje me penallti në minutën e 61-të. Pastaj lojtarja Rose Lavelle shënoi një tjetër gol në minutën e 69, duke vulosur fitoren e skuadrës amerikane.
Edhe pse shënoi suksesi në turneun botëror, ekipi i futbollit të femrave po ngre aktpadi ndaj federatës amerikane të futbollit për pagë të pabarabartë me anëtarët e ekipit kombëtar të meshkujve, të cilët kanë qenë shumë më pak të suksesshëm në këtë sport.
Pabarazia në paga është e theksuar, paga mesatare bazë e futbollisteve femra është afërsisht 30,000 dollarë në vit më pak sesa homologët e tyre meshkuj.
Lojtaret ranë dakord të dorëzojnë padinë e tyre në arbitrazh pas përfundimit të turneut.
Federata e futbollit i dha skuadrës së meshkujve një bonus prej 5.4 milionë dollarësh pasi humbi në raundin e 16-të në Kupën Botërore të vitit 2014, ndërsa ekipit të grave i dha 1.7 milionë dollarë kur fitoi në vitin 2015.
Duke uruar për fitoren, me mijëra persona bënë thirrje në rrjete sociale për pagë të barabartë dhe shpërblim sipas meritave. Thirrjeve për uljen e pabarazisë në paga ju bashkuan dhe dhjetëra kongresistë, mes tyre dhe kryetarja e Dhomës së Përfaqësuesve Nancy Pelosi.
Lojtarja Rapinoe gjithashtu ka polemizuar me Presidentin Donald Trump, duke thënë se si shenjë e kundërshtimit ndaj presidencëns së tij, ajo nuk do të pranonte një ftesë për të shkuar në Shtëpinë e Bardhë, nëse amerikanët do të fitonin titullin.
Fitorja vjen dhe në prag të festimeve madhështore të 4 korrikut, kur nga vetë presidenti u përmend rëndësia e krenarisë të të qenit amerikan./ k.j
Burimi: Zeri i Amerikes
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.