Shkroi: Teuta GASHI
Qëlloi të ishte vajzë. Mund të ishte edhe djalë. Madje është e mitur. E njohin të gjithë, Rahoveci është vend i vogël.
Traumat që ajo ka marrë do e përcjellin gjithë jetën. Në gjendje të tillë, mund të bëhet nënë, askush nuk do e pyesë si ndjehet, në atë gjendje do të rrisë breza të rinj.
Krejt kjo, sepse meshkujt te ne e shohin veten si pronarë. Kuptojeni. Nuk jeni. Ajo ka po aq të drejta sikurse secili. Pa dallim gjinie.
Por, çfarë po ndodh me shoqërinë tonë? A do të kthjellohemi ndonjëherë?
Drejtori i shkollës ku ajo ndiqte mësimet tha se mori thjeshtë disa shuplaka jashtë objektit, policia pa videot deri në alivanosjen e saj dhe tha se nuk kishte shenja dhune. Tmerr.
Ku janë Qendrat Sociale? Mendoni se nëse e merrni në pyetje do thotë ‘PO, nuk dua të jetoj me atë familje.’ Gaboheni.
Nëse ajo do guxonte ta bënte këtë, sepse nuk është rritur në atë frymë që të marrë guximin, as që do i ndodhte ajo që i ndodhi.
Mos i fajësoni shokët dhe shoqet që xhiruan dhe nuk reaguan. Ju a do e bënit?
Atë e rrahën tre persona, policia thotë se vetëm njërin e kanë në mbajtje.
Edhe nëna e saj mori përgjegjësinë. Tha se ajo vet i dërgoi xhaxhallarët e vajzës për ta marrë te një kafene pranë shkollës, qoftë edhe me dhunë.
Një nga xhaxhallarët është asambleist i PDK-së në këtë Komunë.
Mendoni se nëna do donte të ushtronte dhunë mbi vajzën? Nëse PO, është problem i sistemit që edhe ajo u mësua njëlloj, e kaloi jetën në dhunë.
E nëse JO, prapë problem i sistemit, që nuk ia shpjeguan që nëse vajza nuk i shkonte në shkollë, nëna duhet ta dërgonte gjithkund tjetër, te psikologu, apo kudo tjetër, e jo t’i niste disa bisha për të ushtruar dhunë ndaj saj.
Dhunën mos e arsyetoni.
Vetëm po tregoni që të tillë jeni edhe vetë. Duhet reaguar. Nesër njëlloj do ju ndodhë edhe juve, apo fëmijëve tuaj.
Dhuna nuk sjell asgjë të mirë. Gjeni mënyra të tjera, tash secili është i shkolluar.
Kjo 16 vjeçare është vetëm një nga qindra raste në Kosovë. Ngrijeni zërin. Kundërshtojeni dhunën.
Rrisni breza të shëndoshë!/A.A.
Trending Now
You may also like
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.