Të harruar në Siri, protestë për kthimin e fëmijëve nga Siria

Historia e Alvin Berishës, djalit të mbetur në kampin Al-Hol në Siri preku opinionin publik dhe angazhoi autoritetet vendase dhe ato italiane për kthimin e sigurtë të Alvinit pranë familjes. Por thuajse një vit më vonë, është ende i paqartë fati i rreth 50 fëmijëve shqiptar, të mbetur në kampet e ngritur për ish-luftëtarët e shtetit islamik në Siri, të cilët administrohen nga forcat ushtarake kurde.

Familjarë të fëmijëve të mbetur, prej disa ditësh po drejtojnë letra publike ndaj autoriteteve vendase dhe Kryeministrit për angazhim më serioz në përpjekjet e tyre për kthimin e fëmijëve në atdhe.

Shumica e fëmijëve, u morën forcërisht në Siri nga prindër të radikalizuar prej shtetit islamik, në shumë raste prindërit janë vrarë apo i kanë braktisur, duke e bërë më të vështirë mbijetesën e fëmijëve të vetmuar në kampe.

“Janë 50 fëmijë në Siri, që sot duhet të nisnin shkollën si të gjithë fëmijët e tjerë”, deklaroi një prej familjarëve.

Gjendja në kamp paraqitet e rëndë. Aktualisht në Al- Hol janë të bllokuar 69 shtetas shqiptarë, 50 prej të cilëve mendohet të jenë fëmijë.

“Kanë kaluar rreth 7 vite, që nga koha kur fëmijë shqiptarë u morën me forcë nga prindërit e tyre për t’iu bashkuar shtetit që kërkonte të themelonte ISIS në Siri. Që prej kësaj dite për këta fëmijë ka nisur kalvari i dhimbshëm i vuajtjeve, i cili ende nuk po duket të ketë fund… Marrëzia e prindërve u mori fëmijërinë, le te bëjmë diçka së bashku për të mos lejuar edhe shkatërrimin e së ardhmes së tyre!”, shkruhet në njoftimin për organizimin e protestës nga familjarë të fëmijëve.

Protestuesit dhe familjarët kërkojnë përgjigje nga autoritetet se kur fëmijët e braktisur mund të kthehen pranë të afërmve. Javët e fundit ata kanë drejtuar disa letra të hapura për Kryeministrin, por ende nuk kanë një përgjigje. / Historia Ime