“Të rinjtë që protestuan do të trajtohen me psikologë” – kërkohet dorëheqja e Ministres së Arsimit

“Të miturit e protestës do trajtohen me psikologë”- është kjo deklarata që ka bërë pak ditë më parë Ministrja e Arsimit Evis Kushi, për të rinjtë që protestuan 7 ditë me radhë pas vrasjes së 25 vejcarit Klodian Rasha nga policia.

Pikërisht për këtë deklaratë, studentët dhe aktivistët e Lëvizjes për Universitetin, kanë kërkuar ditën e sotme dorëheqjen e Ministres së Arsimit Evis Kushi.

Në një deklaratë publike të mbajtur përpara Ministrisë, ata shprehen se deklarata është e rëndë dhe jo korrekte.

Studentët thonë se Kushi ka njollosur protestën e të rinjëve që kërkonin drejtësi për Klodianin, i cili u qëllua mesnatën e 8 dhjetorit në Tiranë nga një efektiv i policisë.

Të rinjte kanë hedhur bojë te zezë drejt Ministrisë së Arsimit në aksionin e tyre.

https://www.facebook.com/historiaimepikecom/videos/1702299406596139/

Deklarata:

Ju, zonja ministre, për ditë të tëra keni tentuar të njollosni protestën e drejtë të të rinjve.

Të protestosh nuk është krim, por niveli më i lartë i vetëdijes qytetare. Krim dhe kriminale janë tentativat tuaja për të përndjekur të miturit në shkolla, a thua se nuk ka mjaftuar përzënia e mijëra të rinjve jashtë̈ vendit dhe pamundësimi i arsimimit për shumë të tjerë.

Të rinjtë e sotëm kanë nevojë për mundësi ekonomike dhe arsimim të denjë, dhe jo për psikologë të dërguar nga qeveria.

Qeveria juaj ka dështuar në çdo fushë dhe ju, së bashku me paraardhëset tuaja, e keni fundosur përfundimisht sistemin arsimor në Shqipëri. Sot mundësi për t’u shkolluar siç duhet kanë vetëm të pasurit.

Për fyerjen ndaj të rinjve dhe gjithçka që shkon mbrapsht në shkollat tona, ministria që ju përfaqësoni meriton të njolloset dhe ju vetë të dorëhiqeni!

Sot, se nesër është vonë.