Pelikani kaçurrel Xhoni, në një lidhje!

Pelikani i famshëm Xhoni, duket se e ka ndarë mendjen këtë herë.

Pamundësia për të fluturuar nuk e ka penguar që të krijojë një lidhje me shoqen e tij, Vashën. Së bashku ata planifikojnë të krijojnë familjen e tyre. Fillimisht kishin vetëm plane, por tashmë kanë nisur punën për ngritjen e folesë së tyre, pikërisht mbrapa godinës së qendrës së vizitorëve të Parkut Kombëtar, në Divjakë.

Megjithëse Xhoni njihet për sjellje të mirë, kur i ikën Vasha (ajo fluturon) bëhet shumë xheloz dhe agresiv. Kjo tregon se ai e do vërtet shumë shoqen e tij. Presim zhvillime të reja për lidhjen dhe familjen.
“Dhe mos harroni, familja e re ka nevojë për mbështetjen tuaj. Xhoni e pëlqen shumë peshkun që ja servirin aty” – këto janë disa fjalë të shkëputuar nga statusi në Facebook i ekspertit të mjedisit, Abdulla Diku.

Kreditet e fotove: Abdulla Diku

Shpendët e veçanta të gjendura në Parkun e Karavastasë e cila është një zonë e mbrojtur janë bërë një stacion i jashtëzakonshëm ndalimi për fëmijë e vizitorë të moshave te ndryshme të dashuruar pas kafshëve dhe natyrës.

Xhoni është një nga rreth 200 pelikanët që jetojnë në ishullin brenda kënetës. Ai u rrëzua në një banesë në fshatin Kurjan te Roskovecit. Ai u strehua në këtë fshat, duke zgjuar kërshërinë e banorëve me bukurinë e tij. Me pas specia tepër e rrallë, u transportua dhe u strehua në një godinë të Drejtorisë së Parkut, mes pishave në Karavasta, ndërsa specialistët i vendosen emrin Xhoni Malko. Sipas drejtorit te parkut Ardian Koçi iu vendos ky emër në nder të punonjësit Shkëlqim Malko qe kujdesej për te. Shkëlqim Malko rrëfen historinë e tij dhe detaje nga puna ne park. Ndërsa djali që u kujdes për të Xhoni Malko shprehet se ndihet mirë që një pelikan i rrallë, mban emrin e tij të vërtetë. Laguna e Karavastasë është e njohur për koloninë e species së rrezikuar botërore të Pelikanit Dalmat. Prania e këtyre shpendëve është edhe një nga arsyet kryesore që laguna e Karavastasë është përcaktuar si Zonë e Rëndësisë Ndërkombëtare.