Konkurs për podcast – Unë zgjedh Bashkimin Evropian

Afati: 30 Shtator 2019

Historia Ime shpall konkursin e podcastece me temën “Unë zgjedh Bashkimin Evropian”. Ky konkurs është pjesë e projektit me të njëjtin emër, i cili ka për qëllim kryesor mbrojtjen e demokracisë dhe vlerave të së drejtave të njeriut përmes rritjes së njohurive mbi impaktin që procesi i integrimit evropian pritet të ketë në shoqërinë shqiptare.
Projekti gjithashtu vjen në ndihmë të përpjekjeve të Bashkimit Evropian për fuqizimin, zgjerimin dhe diversifikimin e angazhimit të qytetarëve dhe organizatave të shoqërisë civile në procesin e integrimit evropian, me fokus të veçantë në çështjet e mbrojtjes së të drejtave të njeriut.
Integrimi i Shqipërisë në Bashkimin Evropian është një proces, i cili gjatë gjithë fazave të tij kërkon një informim të konsiderueshëm të qytetarëve për përfitimet që integrimi pritet të sjellë për Shqipërinë dhe vlerat themelore të Bashkimit Evropian.

Ky konkurs ka për qëllim angazhimin e të rinjve dhe të rejave në aktivizëm duke promovuar kulturën e respektimit të të drejtave të njeriut përmes formave të reja të gazetarisë dhe informimit publik.

Kush mund të marrë pjesë në konkurs?
Ky konkurs i drejtohet të gjithë të rinjve dhe të rejave të moshës 18 – 25 vjeç, që kanë pasion median dhe gazetarinë dhe e konsiderojnë procesin e integrimit të Shqipërisë në BE si të dobishëm për të ardhmen e tyre.
Tema juaj e podcastit duhet të lidhet me temën e projektit dhe fushën e të drejtave të njeriut.

Si të bëhem pjesë e konkursit?
Nëse je i/e interesuar për të marrë pjesë në konkurs, mund të dërgoni krijimin tuaj në adresën e e-mailit: [email protected]

Aplikimi juaj me e-mail duhet të ketë si subjekt: Aplikim për konkursin e podcast – EMRI JUAJ

Podcasti duhet t’i bashkëngjitet e-mailit në formatin mp3 ose në një format të ngjashëm. Në email ju lutem vendosni dhe të dhënat tuaja si më poshtë:

Emri:
Mosha:
Vendbanimi:

Shpallja e fituesit

Fituesi i konkursit do të vlerësohet me një çmim 200 Euro (përfshirë taksat sipas legjislacionit në fuqi) dhe finalistët do të shpallen në një takim të përbashkët midis pjesëmarrësve të konkursit, ekspertë të fushës, përfaqësuesh organizatash dhe institucionesh.

Podcastet finalistë do të publikohen në www.historiaime.al dhe në rrjetet tona sociale dhe ato të organizatave partnere. Detajet për takimin do të bëhen të ditura pas përmbylljes së konkursit. #UnëZgjedhBE

Në kuadër të iniciativës ‘’Mbështetja e shoqërisë civile për zbatimin e aktiviteteve të ngritjes së kapaciteteve për të rritur mbështetjen e shoqërisë civile në zhvillimin e politikave të dialogut dhe rritjen e ndërgjegjësimit në proceset e integrimit Evropian’’ i financuar nga Delegacioni i Bashkimit Evropian në Shqipëri dhe i zbatuar nga Ministria e Financave dhe Ekonomisë, Qendra Streha në bashkëpunim me ‘’Të Bashkuar Pro Kauzës LGBT (PRO LGBT) – ‘’Unë Zgjedh Bashkimin Evropian’’.