Aktivistë, ambasadorë e aleatë solidarizohen me familjen LGBT të kërcënuar

Të shtunën në mesditë u mbajt një tubim paqësor në Tiranë në shenjë solidariteti me  Edën dhe Albën, dy nënat aktiviste të komunitetit LGBTI të cilat sëbashku më dy vajzat e tyre u kërcënuan me vdekje javën e shkuar.

Protesta u mbajt pikërisht në vendin “e krimit” në Pedonalen e Tiranës, aty ku Eda dhe Alba ishin duke pirë kafe nën shoqërinë e dy vajzave të tyre të mitura javën e kaluar kur u kërcëuuan.

Protestës së solidarizimit iu bashkuan anëtarë të komunitetit LGBTQ+, përfaqësues të Ambasadave të huaja në vendin tonë, miq e aleatë .

Në protestë ishin pjesë edhe Ambasadori i Bashkimit Europian në Tiranë Silvio Gonazato, Ambasadori i Mbretërisë së Holandës Reinout Vos, Ambasadorja e Këshillit të Europës Giulia RE, Këshilltarja dhe Drejtuesja e Bashkëpunimit për Zhvillim në Ambasadën e Suedisë Petra Burcher dhe përfaqësues të të tjerë diplomatikë.

Ne fjalën e saj aktivistja dhe nëna e kërcënuar Edlira Mara tha se: “Dashuria është arma jonë. I bëjmë thirrje institucioneve ligjzbatuese që të vendosin para drejtësisë çdo person që tenton të kërcënojë apo të shantazhojë familjet tona”

“Tani është koha për t’i thënë Jo dhunës, dhe krimit të urrejtjes. Kërcënime të tilla me vdekje në sy të dy fëmijëve të mitur është një këmbanë alarmi jo vetëm për familjen tonë, për komunitetin tonë, por edhe për të gjitha ato familje me fëmijë që jetojnë të pasigurtë”-shtoi ajo.

Edhe aktivistja dhe drejtuesa e Aleanca LGBT Xheni Karaj tha se : Qytetarët LGBTI dhe familjet që ne po krijojmë po trajtohen si armiq të shtetit dhe të popullit, nga një sistem politik që diskriminon duke na mohuar njohjen dhe mbroijtjen e familjeve tona përmes ligjeve demokratike.

Po dehumanizohemi, instrumentalizohemi, stigmatizohemi e portretizohemi si kercënim nga politikanë, pastorë e hoxhallarë, gazetarë e figura publike që hedhin paturpësisht fletë rrufe, nxisin dhunë përmes gjuhës së urretjes dhe më pas e kamuflojnë dhe e justifikojnë me paradigmën e fjalës së lirë dhe mbrojtjes së familjes.

Familjet tona janë këtu për të lulëzuar dhe kapërcyer me kurajo, forcë e qendrueshmëri  cdo sfidë. Familjet tona nuk do të indimidohen nga kërcënimet dhe as nga sfidat që hasin. Familjet tona janë dëshmi e fuqisë transformuese të dashurisë dhe mundësive të pakufishme që ekzistojnë kur i hapim zemrat dhe mendjet njëri-tjetrit.

Ne nuk dorëzohemi, kemi luftuar dhe do të vazhdojmë të luftojmë pa u lodhur për të drejtat tona, kemi kërkuar dhe do vazhdojmë të kërkojmë njohje, dinjitet dhe barazi në një shoqëri që ka synuar të na shtypë dhe margjinalizojë. Kemi marshuar në rrugë, kemi ngritur zërin dhe refuzojmë të heshtim derisa vetë ne, dashuria jonë dhe familjet tona të pranohen, mbrohen dhe respektohen me të drejta të plota./ HistoriaIme