Me datën 28 shkurt Presidenti i Turqisë Rexhep Taip Erdoan ka marrë vendimin për të hapur kufijtë për emigrantët sirianë që duan të shkojnë në Europë. Ky vendim erdhi menjëherë pas vrasjes së 33 ushtarëve turq në një sulm ajror në Sirinë. Veriore.
Menjëherë pas vendimit, emigrantët sirianë kanë mësyrë drejt Europës, përmes kufitit tokësor Turqi-Greqi.
3.6 milionë refugjatë nga Siria ndodhen në Turqi, ndërsa një krizë e re refugjatësh për Europën duket më afër se kurrë.
Forcat greke, i kanë pritur refugjatët me gaz lotësjellës, ndërsa qeveria e Greqisë ka shpallur gjendjen e jashtëzakonshme me datën 2 mars dhe ka pezulluar të gjitha kërkesat për azil për një muaj, gjë që është duke u parë si në kundërshtim me të Drejtën Ndërkombëare.
Sipas profesorit në Universitetin e Parisit për ligjin europian, Alberto Alemanno, pezullimi grek përfaqëson një “manifest të ligjit europian për azil dhe ligjit ndërkombëtar humanitar duke krijuar një mekanizëm të paprecedentë, që me shumë mundësi do t’i dënojë azilkërkuesit duke i depërtuar apo me vdekje.”.
Të Shtunën dhe të Dielën, rreth 14,000 imigrantë të paligjshëm u përpoqën të kalojnë në Greqi nga rajoni Evros, ndërsa mediat e huaja raportojnë se 120,000 njerëz janë duke u mbledhur në brigjet turke dhe duke pritur të kalojnë në ishujt grekë.
Veç Greqisë edhe Bullgaria pret një valë emigrantësh në kufijtë e saj, ndaj ka shtuar dhe praninë e trupave kufitare me urgjencë.
Nga ana tjetër Hungaria ka marrë masa drastike për të ndaluar hyrjen e refugjatëve në territorin e saj.
Kryeministri hungarez Viktor Orban po përdor epideminë e koronavirus si një justifikim për të ndaluar kërkesat për azil në Hungari, ka shkruajtur themeluesi i Iniciativës Europiane për Stabilitet në Twitter.
Këshilltari i Orban për siguri kombëtare tha më 1 mars se Hungaria kishte pezulluar hyrjen në kufijtë tranzite për azilkërkuesit, për shkak të rrezikut të përhapjes së COVID-19.
Bashkimi Europian nga ana e tij, e ka mbrojtur qëndrimin e ashpër të Greqisë, ndërsa rrezikohet seriozisht marrëveshja e refugjatëve mes BE dhe Turqisë.
“Kështu që kjo është sigurisht, një situatë shumë serioze dhe Greqia ka nevojë për gjithë mbështetjen nga Bashkimi Europian, si nga Komisioni ashtu edhe nga vendet anëtare”, tha Ylva Johansson, Komisionerja për Çështjet e Brendshme të BE-së.
“Unë e pranoj se Turqia gjendet përballë një situatë të vështirë për sa i përket refugjatëve dhe emigrantëve, por ajo çka po shohim nuk mund të jetë as përgjigja e as zgjidhja,” tha për mediat presidentja e Komisionit Ursula von der Leyen. “Kështu që do të duhet të nisim një dialog më intensiv me Turqinë”.
Kancelarja e Gjermanisë, Angela Merkel, një ndër zërat e fortë të BE, ka thënë se Erdoan nuk duhet të përdor refugjatët për presion ndaj Unionit.
Merkel, tha se e kupton që presidenti turk priste më shumë ndihmë nga BE-ja për krizën e refugjatëve, por shtoi se ai nuk duhet t’i përdorë ata njerëz për ta shprehur këtë pakënaqësi.
Europa qartas nuk i dëshiron refugjatët sirianë, ata që po flenë prej ditësh tanimë në kufirin mes Turqisë dhe Greqisë, që është edhe porta hyrëse për refugjatët në “tokën e premtuar” Europë.
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.