Policia Shqiptare dhe organizatat LGBT pjesë e së shtunës rozë në Holandë

Një përfaqësi e Policisë së Shtetit e shoqëruar me përfaqësues nga organizatat Pro LGBT dhe Aleanca kundër diskriminimit LGBT u janë bashkuar aktiviteteve që do të mbahen në Holandë me rastin e së shtunës rozë.

E shtuna rozë në Holandë simbolizon ditën e marshimit për të drejta të barabarta dhe pranim të komunitetit LGBTI+ në shoqëri. Që prej vitit 1979, në këtë datë zëra të ndryshëm të shoqërisë bëhen bashkë në qytete të ndryshme të vendit për të promovuar komunitetin LGBTI dhe në mbrojtje të diversitetit.

Policia Shqiptare është bërë pjesë e këtyre aktiviteteve falë një projekti të udhëhequr nga organizata COC në Holandë dhe Komiteti i Helsinkit në bashkëpunim me Pro-LGBT dhe Aleancën kundër diskriminimit LGBT në Shqipëri.

Projekti synon rritjen e vizibilitetit dhe pranimit të komunitetit LGBT+ nga shoqëria shqiptare si dhe krijimin e planeve vendore të veprimit për adresimin e problematikave LGBTI.

Në një intervistë për gazetën “De Limburger”, Sidita Zaja, drejtoreshë ekzekutive e Pro-LGBT foli për rëndësinë që ky projekt ka për policinë shqiptare, duke i mundësuar atyre të shohin më qartë diskriminimin, dhunën dhe përbuzjen me të cilët përballet komuniteti në Shqipëri.

Situata po përmirësohet dalëngadalë, kryesisht në kryeqytet. Por jashtë Tiranës ka ende punë për tu bërë. Shumë individë LGBT kanë ende frikë të dalin hapur në shoqëri mbi orientimin e tyre seksual. Ata përballen me dhunë, diskriminim dhe vështirësi për tu punësuar.

Ajo shpreson që pjesëmarrja e Policisë së Shtetit në të shtunën rozë në Holandë, t’i bëj ata më të ndjeshëm ndaj kauzës dhe njëkohësisht të mund të ndihmojnë në mbarëvajtjen e organizimeve të tilla në Shqipëri në një masë më të gjerë e që shtrihen përtej Tiranës.

Në kuadër të kësaj dite, forcat policore në Holandë bëjnë ngjyrën rozë pjesë të uniformës së tyre, për të simbolizuar përkrahjen ndaj individëve LGBTI+ në shoqëri. / k.j