Njëri pas tjetrit, në rrjete sociale, po denoncohen libra shkollore të cilët kanë përmbajtje të gabuar, seksiste, diskriminuese dhe në disa raste përdorin terminologji jo të përshtatshme apo edukuese për fëmijët e shkollave dhe studentët në auditore.
Skandali i parë u publikua para disa ditësh në disa media të Kosovës, ku u denoncua Libri i kriminalistikës i Prof. Dr. Vesel Latifit në Fakultetin Juridik të Universitetit të Prishtinës. Në këtë libër studenëve të juridikut, avokatëve, prokurorëve dhe gjyqtarëve të ardhshëm, u mësohet se viktima të dhunës seksuale kryesisht janë femrat që janë mendjelehta dhe të përdala, transmeton lajmi.net.
“Karakteristikat e Viktimave të Marrëdhënies Seksuale me Dhunë – Viktimat të marrëdhënieve seksuale me dhunë zakonisht janë femrat që gënjehen lehtë, të pakujdesshme, mendjelehta, dhe të përdalura, rrethanat te të cilat sjellin me vete edhe një situatë viktimogjene (sulmin ndaj tyre)”, shkruhet në këtë libër.
Por librat problematikë nuk gjenden vetëm në sistemin universitar, por dhe në atë të arsimit fillor. KultPlus sjell disa denoncime nga rrjetet sociale, ku qytetarë të shqetësuar tregojnë mbi përmbajtjen e librave shkollorë me të cilët mësojnë fëmijët e tyre në shkollën fillore.
Njëri nga denoncimet flet për tekstin shqetësues me titullin “Ah, këto vajza”, ku vajzat përshkruhen si: “frikacake, të pafuqishme, të dobëta, që vetëm qajnë, nuk dinë të zihen, janë tërë naze, tërë lajka. Lotët s’i kanë për gjë, as që u vjen zor nga vetja…S’kanë fare fuqi, vetëm të lodhen dinë.., i ruhen rrezikut. Një dy, vec të klithin dinë…“. Ky tekst gjendet në librin Gjuhë Shqipe e klasës së pestë.
Një tjetër rast është libri i Edukatës Muzikore të klasës së parë, ku fëmijëve u paraqitet versioni “i përshtatur” i këngës së njohur “Dy dele, treqind pare” dhe ku terminologjia e përdorur është jo vetëm arkaike e larg shqipes standarde, por dhe nuk i shërben qëllimit edukativ të lëndës së Edukatës Muzikore./ k.j
Trending Now
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.