Veç problemeve të tjera në sistemin shëndetësor, pacientëve të Qendrës Spitalore Universitare “Nënë Tereza” (QSUT) iu duhet të shqetësohen edhe për sigurinë e tyre. Gjatë dy ditëve të fundit në komisariatin nr.4 janë denoncuar dy raste vjedhjesh të pacientëve.
Ngjarja e parë është denoncuar nga një 61-vjeçar nga Shijaku, i cili është plaçkitur gjatë kohës që priste për t’u vizituar në ambjentet e QSUT. Shtetasi me inicialet S.E ka humbur portofolin në të cilin deklaron se kishte 13 mijë lekë të reja dhe dokumentat e identifikimit.
Një ditë më vonë, një 54-vjeçar me inicialet I.D, banues në Kamzë ka denocnuar po të njëjtën vjedhje teksa priste në Qendrën e Konsultave Mjekësore në QSUT. Në denoncim thuhet se vjedhja është kryer nga një person që i qëndronte vazhdimisht pranë e që më pas i kishte humbur nga sytë.
Nga përshkrimet që ka dhënë i dëmtuari, policia dyshon se autori mund të jetë një person rreth të 40-ave, që hiqet si pacient, duke ecur nëpër korridore dhe herë pas here u afrohet pacientëve të tjerë që ndodhen në të njëjtin vend me të, apo familjarëve që presin të sëmurët.
Problemi i vjedhjeve të pacientëve apo familjarëve të QSUT vijon prej kohësh, dy muaj më parë u arrestuan tre të rinj që kryhenin vjedhje dhe para një muaji një 57-vjeçar u vu në pranga për të njëjtën arsye.
/l.k./
Trending Now
Historiaime.al është një zë i pavarur në mbrojtje të të drejtave të njeriut. Ne raportojmë si për shkeljet e të drejtave të njeriut ashtu edhe për histori njerëzore që i promovojnë këto të drejta. Ky projekt synon të ndryshojë qëndrimet jo fort etike karshi të drejtave të njeriut nga ana e medias kombëtare si ajo e shkruar, ashtu edhe ajo vizive dhe media e re online.