Qytetet e Maqedonisë dhe Bosnjes të rrezikuara nga ndotja e ajrit

Me ardhjen e vjeshtës, njerëzit fillojnë të dallojnë përkeqësimin e cilësisë së ajrit në Tetovë, një qytet i vendosur në ultësirën e malit Sharr dhe një nga 10 vendet më të ndotura në Europë. Shumë prej qytetarëve të Tetovës, kanë frikë se duke u afruar dimri, gjendja do të përkeqësohet. Në të kaluarën, autoritetet janë detyruar të mbyllin shkollat për shkak të smogut. Ndotja vjen jo vetëm për shkak të industrisë, por dhe prej përdorimit të drurit dhe qymyrit për ngrohje, raporton Reuters.

Një studim i fundit i Organizatës Botërore të Shëndetit (OBSH), renditi 10 qytetet europiane me cilësinë më të keqe të ajrit dhe në listë gjenden Tetova si dhe qyteti industrial i Tuzlës, i vendosur në rajonin e Bosnjës lindore. Të dy këto qytete rezultojnë të kenë ajrin me përqendrimin më të lartë të grimcave toksike në kontinent.

Të dhënat e Bankës Botërore thonë se në Maqedoni humbasin çdo vit jetën rreth 1,350 njerëz, për shkak të ndotjes së ajrit tej normave të lejuara, ndërkohë që shpenzimet për ekonominë të shkaktura nga ndotja arrijnë në mbi 200 milionë euro.

Tetova dhe Tuzla janë shumë të varur nga industria ndotëse e qymyr gurit, i cili vazhdon të përdoret dhe për ngrohje gjatë dimrit. Emetimet gazit karbonik nga automjetet e vjetra janë gjithashtu një kontribues i madh në ndotje./k.j

Burimi:reuters